Хъусрал-ЧIар
КутIасса справка

[dropcap]Ч[/dropcap]Iарттал шяравалу цурда диркIсса кIанттай хIасул хьуну дур ХVIII ттуршукулул кIилчинмур дачIинний. Жулла лакрал ЧIари тIисса цамур шяравалугу духьукун, ванийн учайсса бивкIун бур Хъусрал-ЧIар куну.Хъусращату шиккун дур мукьра километра. Ва цурдагу ккалли хъанай дур Ккуллал райондалул кьиблалул чулийсса кIийхра-кIийхсса шяравалуну.

---

 

Аьрасатнал паччахIлугърал 1886 шинал дурну диркIсса агьалинал переписьрайн бувну, Хъусрал-ЧIарттал шяраву бивкIун бур 39 къатта, микку яхъанайгу ивкIун ур 193 инсан – 99 чув-адамина, 94 хъамитайпа. Ми цинярдагу тIювардай бивкIун бур: 50 балчан, 3000 яттил хIайван, 250 лухIи гъаттара. КIицI бансса затну хъанай бур ва шяраву ябуллай къабивкIшиву цавагу ттукку – зунттавусса хьхьичIунмур транспортран хIисавну бивкIсса. Мунил сававнугу хъанай диркIссар тIар Хъусрал шяраваллил сайки цинярда хъуругу, ххалазаннугу кьасса кIанттай душиву, ва гьивулунгу гьарца иширангу ишла байсса бивкIшиву анжагъ дучри.
ЧIарттал шяравалу сакин хьуну диркIун дур, аьмну хIисав бувну, мукьва тухумрая – Абакархъул, Усттархъул, Багъа­хъул ва Шаллахъул. Ми тухумирттал мархригу нанисса бивкIун бур Гъази-Гъумучату.

1936-ку шинал сакин дурну диркIун дур Стахановлул цIанийсса колхоз.
1933-ку шинал тIивтIуну бур байбихьулул школа, миву ккалайгу ивкIун ур 9 оьрчI. Цалчинма учительнугу ивкIун ур Ахиев Шамсуттин тIисса ДучIиятусса адамина.
Хъун дяъвилул фронт­райн 1941-кусса шинал лавгун 38 инсан, миннавасса 12 ливчIун ур аьраяллил майданнай.
Мичиххичнал аьрщарайн бизан буллали­сса шинал Хъусрал-ЧIарав диркIун дур 54 тIюва, яхъа­найгу ивкIун ур 251 инсан. Бизан бувну махъ Ккуллал райондалия­сса ялагу 6 шяраваллищал цачIуну миналул хьуссар Чапаевкаллал шяраву.
Халкьуннаву ливчIун бур бизан бувну нани­сса чIумал цуманаллив ля­хъан бувну бивкIсса укун­сса шаммардугума:

Зунтту зунттуйн аманат,
Ар микIирайн аманат,
ЧIарттал бявкъу щаращив
Хъусращияйн аманат.
Яша-яша Астталин,
Яша-улла Астталин,
Жу ина Яша уллай,
Ина дайсса лавмартшин.

ЧIарттал шяравалу диркIсса кIанттай хъусращиял гъаттарал пирмагу, ХIусман ХIусмановлул (аьпа баннав цал) цIуну дурсса къатригу дур. Ваналва хIарачатрацIух кIикку дацIан дурну ду­ссар гьайкалгу.