Августрал 27-нний ДР-лул БакIчиначIа хьунни нюжмардий цал шайсса батIаву. Микку Владимир Васильевлухь бувсунни Дагъусттаннай «цIинцIал реформа» нанаврил
ва муницIун хIасул хъанахъисса захIматшивурттал хIакъираву.
[dropcap]Б[/dropcap]атIаврий гьуртту хьунни исполнител властрал органнал ва кIанттул цилакаялувшиврул органнал каялувчитал.
Владимир Васильевлул тIимунийну, экологиялул масъалартту щалагу билаятрай ккалли хъанай бур ца яла агьамминнувассаннун, Дагъусттаннай тIурча, ми бур яла бакI цIуцIи буллалими, дузал бан захIматми.
Дагъусттаннал цаппара районнай, миннувух зунтталминнуйгу, дуллай бур цIинцIал бакIурду бухлаган буллалисса давуртту, амма, даву дуллалийни, чIалан бивкIунни, картардай ми бакIурду бакъанугу, иширайну ми буну бушиву.
Республикалул каялувчинал бувсунни аьркинну бушиву жавабру дулун укунсса суаллахьхьун: дуркIссарив республика кьянкьасса коммунал ххиличIрурдалсса байсса цIусса системалийн, ци дурссар му система зузи даншиврул, гьассарив му зуншиврул республикалийсса норматив база, щаллу дурссарив коммунал багьрал тарифру бахханаххи баврил мониторинг? Васильевлул пикрилий, махъва-махъмур суал жулла республикалун ляличIину цIуцIисса кIануну бур, цанчирча «бизнес чIяву чIумал зий дур инсап дакъа». Мунал тапшур бунни му масъалалух къулагъас ххишала дуван.
Ми циняв суаллахьхьун жавабру дулун хIарачат бунни цалва ихтилатраву ДР-лул тIабиаьтрал луртаннал ва экологиялул министр Набиюлла Къарачаевлул. Мунал тIимунийну, гьашину январьданул 1-нния махъ республика дуркIун дур цIусса системалийн, амма ттигу-шилагу дузал буллан аьркинну бур экологиялуву шиннардий салкьи хьусса захIматсса масъалартту, миннувух – цIинцI дукьаврилссагу. Махъсса 20 шинал мутталий цичIав дурну дакъар му аралуву даву чулийн дуккан даншиврул.
-Агарда му даву жура цIуну дайдирхьуну диркIссания, масъала дузрайн буккан буван бигьану бикIанссия, — мукIру хьунни Къарачаев.
Минприродалул бакIчинал дащуй бивхьунни муниципал сакиншиннардал ва шагьрурдал округирттал каялувчитал: «Миннал шиннардий цичIав къадуллай бивкIун бур му системалул даву цалийн дуциншиврул», — увкунни мунал.
Министрнал бувсунни цалва министерствалул дурсса давурттая. Мунал тIимунийну, «Экология» тIисса нацпроектрацIун бавкьуну, регионнал 5 шинал мутталий – 2019-2024 шиннардий дузал дуван аьркинну дур ТБО (твердые бытовые отходы) дукьан даврил цIусса система. Му даву бартдигьин Дагъусттан хIадурссар 2 шинал мутталий – 2020 шинал ахирданийнин, амма бакIрай аьркинну бур щаллу буван цаппара масъалартту. ЦIусса системалийн бучIаншиврул аьркинну бур дузал буван полигонну. Муниха цIана зий бур.
Владимир Васильевлул суалданухьхьун жаваб дуллай, Н. Къарачаевлул бувсунни контейнердал площадкартту дузал баврил иширттаятугу, цIинцI чув зана-кьала дуллай буссаривгу. Министрнал тIимунийну, «Экология» тIисса нацпроектрал лагрулий 2020 шинал ахирданийннин Дагъусттаннай буван най бур 8-10 цIинцI зана-кьулу дайсса (мусороперерабатывающий) завод.
Ихтилатру бунни цаппара шагьрурдал ва районнал бакIчитуралгу.
Владимир Васильевлул баян бунни ва батIаврил ахирданий хIадур дуван аьркиншиву давурттал план, му «ххуллул карта» бартдигьаврил ялув бацIавугу дуллантIий бушиву.
