Августрал 24-нний ДР-лул премьер-министр Артем Здунов ивунни республикалул цаппара промышленностьрал идарарттайн. Миннувух бия Къизилюртуллал заводру: ООО «Пионер», ООО «Евроресурс» ва ООО «Юг Спецгидромонтаж».
ООО «Пионер» хъанай бур калпушру итабакьайсса ца яла хъунмур завод, зий байбивхьуссар 2002 шинал. ЦIана зий бур 3 сменалий. Заводран харж дурссар 125 млн. къурушрал дуциндарайсса залуннал инвестицияртту. Мунил итабакьайссар шинай 16 млн. калпушрал, микку зий ур 73 инсан, миннал ласайссар яла чанну 30 азарда къуруш.
Миккува Артем Здуновлул ххал бивгьунни цемент – байсса заводгу. Муний буллай бур М-400 ва М-500 журалул цемент, шинай 56 азарда тонна. Проектрай ккаккан дурссаксса 250 азарда тонна дуккан дуллан тIий бур чIал къавхьуну.
Мичча премьер-министр ва мунащал архIал бивзми бувкIунни «Юг СГЭМ» тIисса заводрайн. Микку батIлай бур ва бакьин буллай бур гидроэнергетикалул, гидромеханикалул зузи бай ярагъ (оборудование), дуллай бур электростанциярттал, насосрал станциярттал металлоконструкцияртту. Миннуяр ххишалагу, му заводрал дуллай бур электроэнергетикалул объектирдай ремонтрал давурттугу.
Заводру зузаврил хIакъираву Здуновлул укун увкунни: «ХIукуматрал даражалий жу ххал бигьарду жулва заводру бюхъайссаксса щаллуну зузаврил хIакъиравусса масъала.
ЖучIара дур ва шинайнсса хъуннасса инвестициярттал программа. Нацпроектирдан хасну итадакьлай бур тамансса арцу. Жунма аьркинссар республикалул заводру бюхъайссаксса щаллуну зузи бан. Жу зунтIиссару так ХХI ттуршукулул тIалавшиннардацIун бавкьуну зузисса заводирттащал», — увкунни Артем Здуновлул.
