Ларгсса нюжмаркьини МахIачкъалаллал бакIчи Салман ДадаевлучIа хьунни ЖКХ-лул аралул каялувчитал ва пишакартал гьурттусса батIаву.
Шикку хьхьичIва-хьхьичI сукку бувсса ихтилатгу ччя-ччяни лешлашисса чаннал масъалалун хасъсса бия. УЖКХ-лул зузалтрал кIицI бувна ттукIрал масъала дузрайн букканшиврул, машан ласун багьлай бушиву цIусса трансформаторду ва цIу дуккан дан аьркинну бушиву ттукIрал хозяйство. Шагьрулул бакIчинал амру бувна, цIубакIрай шагьрулул кучардайсса циняв трансформаторду ххал бувну, миннул заллухъру ца бурив хъирив лавсса хъуслил инвентаризация дуван.
ЧIяру зивурду дусса къатрал кIинтнийнсса хIадуршиннарая шикку бувсуна Муниципал къатрал ялувсса управлениялул хъунама Пазлуттин Увайсовлул. Шагьрулул бакIчинал цала пишакартурахь тавакъю бувна ва масъалалул вив бувххун, школарттай, азарханарттай, детсадирттай ва цаймигу идарарттай кIинтнийнсса хIадуршинна цукун най дурив ялув бацIан.
Мукунма ванал кIицI лавгуна, хъуншагьрулул УК-раясса ва ТСЖ-рдаясса тIалавшинна хъун хьунтIишиву ва агьалинаясса аьрзирдах хъуннасса къулагъас дуллантIишиву. Шиккува баянгу бувна халкьуннащалсса цIухху-бусурду буллай, управляющий компаниярттал рейтинг дуллай байбишинтIишиву. Вайннал дурсса давурттан кьимат бищунтIиссар бакьин бувсса подъездирттал аьмсса тагьар ххал дурну махъ. ЧIал къархьуну шагьрулий щурунтIиссар подъездру бакьин буллалисса программа. Гьаз бувна батIаврий шагьрулул кучарду цIинцI-ччюрклицIа марцI буллалисса масъалагу. УЖКХ-лул пишакарнал кIицI бувна, ссут дучIаврищал шагьрулул кучардай мурхьру бугьлагьисса давурттугу чIал къархьуну дайдишинтIишиву.
