Августрал 4-нний Оьргърал (Кубачи) шяраву хьунни «Аьрасатнал халкьуннал художествалул канил пишарду ябаврил ва цIу буккан баврил ххуллурду» тIисса цIанилусса конференция. Му хьунни Аьрасатнал Кьиблалул халкьуннал канил пишардал цалчинсса фестивальданул лагрулий.

Бадрижамал Аьлиева
Муний гьуртту хьунни 50-ннийн бивсса аьлимтал, Аьрасатнал личIи-личIисса регионнаясса муаьллимтал.
БавтIминнал хьхьичI ихтилат буллай, «Аьрасатнал халкьуннал художествалул пишарду» тIисса Ассоциациялул председатель Геннадий Дрожжиннул бувсунни канил пишардал масъалар­ттая, ми цукун щаллу буллай бу­ссарив, хIукуматрал чулуха цукунсса кабакьу буссарив.

Докладру бунни: РАН-лул Н.Н. Миклухо-Маклайл цIа­нийсса Этнологиялул ва антропологиялул институтрал директорнал хъиривчу Марина Мартыновал, Аьрасатнал этнографиялул музейрал элмийсса зузала Евгения Гуляевал, Чачан Республикалул Гуманитар хъиривлаявурттал институтрал элмийсса зузала Тамара Шавлаевал, Пятигорскаллал Сервисрал, туризмалул ва дизайнрал институтрал дизайнрал кафед­ралул доцент Любовь Ягушев­с­каял ва м.ц..
Конференциялул гьурттучитуран сакин бувна Оьргърал шяравухсса экскурсиягу. Шяраваллил тарихрая хъамаллурахь бувсуна дянивмур даражалул школалул учитель ХIажимахIаммад Къараевлул.