Ися Рамазанов (дянив), Расул (киях), Идрис
Къуртал хьунни Ухссавнил Ккавкказуллал жагьилтурал «Машук – 2019» тIисса форумрал кIилчинмур смена. Микку гьуртту хьуну, хьхьичIунсса даражалий цала проект ккаккан бунни ДГУ-лул управлениялул факультетрал 2-мур курсирай дуклакисса Хъусращатусса Рамазанов Расул Аьлил арсналгу.
— Форумрая ттун кIул хьуна МахIачкъала шагьрулул администрациялучIасса Жагьилтурал центрданул директорнал хъиривчуну зузисса ттула буттал ссурахъу Исяя. Ва цувагу цимилагу гьуртту хьуссар ва форумрай. ДакIний ухьунссархха зунагу, ларгсса форумрай ванал Аьрасатнал Президент Владимир Путиннул хьхьичI бивхьуссар «МарцIсса Каспий» тIисса проект. Цувагу хъанахъиссар «Чистые игры» тIисса бяст-ччаллий цIинцI-ччюрк датIавриха зузисса щалагу Аьрасатнал экологиялул проектрал координатор.
Ися дуклай унува агьуна жяматийсса давурттахун. Ттунгу маслихIат бувна форумрай гьуртту хьун, — буслай ур Расул. – Нагу, навалу къаачин, ттущала ттула хьхьичIунсса гьалмахчугу кIункIу увссия, ттущала ца курсирай дуклакисса Шаллал шяраватусса Аминов Идрис Адамлул арс.
— Буси зула проектрая.
— Цувагу экологиялул проектирдаха зий ухьувкун, Исял жунгу мува проектраха зун маслихIат бувна. Жул проект бур МахIачкъала шагьрулул школарттал лагма-ялттусса кIанттурдай жучIава яшайсса мурхьру бугьавриха зунсса. Мурхьру цивппагу бугьлантIиссар школа къуртал буллалиминнал.
Агарда школалул лагма-ялтту мурхьру бугьансса кIану бакъахьурча, бугьлантIиссар миккун гъансса кIанттурдай. Проектрал давривун кIункIу бантIиссар бувгьусса мурхьирдаха къуллугъ буллансса волонтертал – «экологический десант».
Проектгу хIадур дурну, жу лавгру «Машукрайн» итабакьинсса проектру личIи буллалисса форумрайн. Проект кьамул бувна, амма лащу-щаллу бан багьлай бур увкуна. Идрислул проект щаллу буллалиссаксса хIаллай, на презентациялуха зий уссияв. Форум дайдишин ххюва гьантлул хьхьичI жуйн оьвкуна проект кьамул бувшиву бусан.
— Цукунсса асардащал зана хьуру форумрая?
— Форумрал кIулшиву дулаврил программа дия хъинну мюнпатсса. Оьрмулул личIи-личIисса арардаву ишла хьунсса кIулшивуртту дуллунни жун микку. Спортралмур программалуву жул делегациялул гьарца бяст-ччаллай цалчинми кIанттурду бугьарду. На гьуртту хьура волейболданул бяст-ччаллий, Идрис – «Энерго-квестрай».
ДакIний личIансса хьунни Республикалул БакIчи Владимир Васильевлущалсса, цIанихсса тренер Аьбдулманап НурмахIаммадовлущалсса, хьхьичIунсса спортсментуращалсса, космонавтътуращалсса хьунабакьавуртту. ХIасил, асардал дурцIусса дакIнищал зана хьура форумрая ялунчIилгу гьуртту хьунсса ниятрай.
— ТIайлабацIу баннав вин, Расул, дуккавривугу, жяматийсса давурттавугу.
ПатIимат Шихшаева
