Зий айивхьуну ур 100 зузала

[dropcap]Р[/dropcap]айондалул бакIчи Юсуп МахIаммадовлул оьвкуну, Лакрал райондалийн бувкIунни «Дагестанавтодор» ГКУ-лул каялувчи ТIагьир Азаев бакIчисса делегация. 

Делегациялувух бия Саратовуллал ламурдал проектру дайсса институт­рал директорнал хъиривчу Сергей Викторович ва цаймигу пишакартал. Вайннал аьрххилул мурад бия Лакрал райондалий буллалисса кIива ляличIисса ламул ял­тту буккансса.

---

Зулайхат Тахакьаева
КIива цIусса ламу буллалиссар ШавкIрату Щаравсса автомобил ххуллул бутIуй «Мамраш-Ташкапур-Араканнал ламу». Ца ламу буллай бур ШавкIуллал неххайх, ттуршлий ххюцIаллий ряхра метра лахъишиврий, ряхцIаллий ххюра метра лахъшиврий дусса. КIилчинмур ламу – Гъази-Гъумучиял Хъуннеххайх, ттуршлий ххюцIалла метралул лахъишиврий ва гьануцIа ттуршлий кьуния урчIра метралул лахъшиврийсса.
Ва ххуллул бутIа бур микI-чIикI, гъараллу дусса чIумал транспорт лахъан хъинну нигьачIисса, апатIру чIявусса шайсса.

Юсуп МахIаммадовлул бувсунни гьан-бучIан жапасса ххуллий чIявусса оьзрурду хъанай, кIирагу районнал агьали совет заманнайва тамансса кIанттурдайн бувкшиву, ва ххуллу куклу бансса чаранну лякъинсса тавакъюрдай. Пишакартал бувкIун, ххуллул тагьар ххал диргьуну, ва кIанттай, мяйжаннугу, чара бакъа ламу бан багьлай бушиврий цивппа мукIру хьуну, проектраха зий байбивхьусса ппур­ттуву СССР-гу ппив хьуну, ламул масъалагу щяв багьну бивкIшиву.

Махъсса шиннардий кIирагу райондалул агьали цIунилгу вава масъала сукку буллай байбивхьукун, Юсуп МахIаммадовлул цимилвагу пишакартал бучIан бувну, цIуницIакул сукку бувссия ва агьамсса масъала. Ахиргу республикалул каялувчитуран хIукму бунни ва ляличIисса проект дузрайн ду­ккан дансса.
КIилчинмур ламу лап захIматсса кIанттай бан багьлай бушивугу хIисавра­вун лавсун, ва хъанай бусса бур щала Ух­ссавнил Ккавкказнаву яла лахъисса ва лахъсса ламу.

Райондалул агьалинал цIания Юсуп МахIаммадовлул барчаллагь увкунни республикалул БакIчи Владимир Васильевлухь, ХIукуматрахь, «Дагестанавтодор» ГКУ-лул каялувчитурахь, подрядчик «Мостоотряд-99» АО — лухь, архсса зунттал районнал экономика ва агьалинал ахIвал хьхьичIунмай бансса проект зузи даврихлу.

Ламурду буллалисса кIанттай шанна чIумуй зий ур 100 зузала.
Делегациялул вакилтуран цала яруннин ккавккунни пишакартурал даврил шартIру ххуйсса душиву, даву цила кьаралданий най душиву. «Мостоотряд-99» АО-лул каялувчитурал бусласимунийн бувну, агьамми давуртту къуртал хьунтIий дусса дур шинал ахирданийнин.