Квасрал кумаграйну мудангу халкьуннал хъин дайсса диркIссар авитаминоз, оь чанну бушиву, цинга. Квасраву гьарзассар организмалун чара бакъа аьркинсса витаминну ва микроэлементру.
Му бакъассагу, гъинттул квас мякь лиххан байсса нахIусса хIачIиягу дур. Квас хъинссар гастрит думиннан, невроз, депрессия думиннан, шану къабиллалиминнан, давление лахъминнан, атеросклероз ва цаймигу цIуцIавурттан. Квасраву дуссар чIярусса накIлил кислатIа, дукра лялиян дан, цIу чурххава буккан бан кумаг байсса.
Квасравусса лахърулул диабет дусса инсаннал тагьар ххуй дайссар, ттиликIран, ччаруллан хъинссар.
Утти бусанну квас шарда дан шайсса куцгу.
Щинал 3 литIра щаращи дурну, 0,5-1 кг. сусул ччатIул ялун дутIайссар. ЧчатI кьакьан бувсса бухьурча хъиннува хъинссар. Ца хьхьунусса цIансса кIанттай бишайссар кIункIур. КIюрххил дигьайссар. Гивун 4 хъунна къуса хIуву качарданул, ца хъунна къуса кишмитIутIул, ца чяйлул къуса лахърулулгу (дрожжи) дирчуну, бишайссар кIункIур, гъилисса кIанттай щаран (дияннин). Гьунттий квас хIадурссар: цIунил диргьуну, кьалакьигу ялун ларкьуну, дишайссар холодильникраву.
— КъабучIиссар квас гьарзану хIачIлан ттиликIрал захIматсса цIуцIаву думиннан.
-ТIантIри, угри, цIуцIитIинхь, экзема думиннан хъинссар гьантлун кIийлла-шамийлла дуккан лажиндаравух квас, яла 10 минутIрава лажин вилаган аьркинссар.
— Ччаруллан, циститран, гьутрурдан хъинссар шамийлла дукра дукан дачIи ссятрал хьхьичI ца-ца стакан гъили дурсса хъалул квасрал ца хъунна къуса ницIащал.
-Бронхитран, хъугьулун, аьвкъу-гъили хьуни, бянивссаннун, ттурчIардивун къювурду дусса кIанттурдай квасрал компрессру бувнугу хъинссар.
ЧIикIунтIалулссагу
-Гипертония, атеросклероз, ттиликIран, ххютту-канил цIуцIавурттан хъинссар чIикIунтIалул квас.
— Дянивсса лагрулул шанна чIикIунтIа шюршуну, мюрш дайссар. Дичайссар 3 л. банкалувун, ялун бичайссар кьакьан бувсса сусул ччатI (сухари). Банка дуцIин дайссар щаралархъсса дюхлулсса щинал. Ялув кисайгу дархIуну, дишайссар цIансса дюхлулсса кIанай. Щаран дикIайхту, квас хIадурссар.
ХIадур бувссар
Т. ХIажиевал
