Липецкаллал омоновец Андрей Тепериклул жан дуллуссар Дагъусттаннай, цалами бивкIулия буручлай.
Андрейл кулпатравусса суратру ххал дуллай ура. Царагу суратрай ва милицанаха лавхьхьусса акъар. Укунсса оьрчIру ряхцIалку шиннардил кинордаву ххал шайва – тяхъасса, хъинсса, битавсса ва гьарцаннан тIайламур хьурдай тIутIисса.
Ттул пикрилий, Андрей дунияллийн уккан чансса чIал хьуну ур, цанчирчан ванал жагьилшиву яла оьккимур чIумуйн тIайла дарцIуну дур, мукуна Андрей ивчIангу анавар увккун ур – ванал яла жагьилмур оьрмулул ялун дяъви бивну тIий.
Цалчин Андрей ккавкми махIаттал хъанай бия, цукунсса омоновецри ванаяту шайсса? Мяйжаннугу, цалла 27 шинан ва хъинну чIивину чIалай ия. Ялун мукун чIалайнугу, Андрей цимигу шинай кIумур атлетикалухун машгьурну ивкIун ур, ванал шарда цикссагу грамотартту ва медаллу дур, личIи-личIисса бяст-ччаллай ларсъсса. Битавшивугурив – ччима къачагънащал лаянсса кунасса ия. Му бакъассагу, Андрейн хъинну ххирая цалла форма ва къуллугъ. МахIачкъалаливгу левххун ур хъинну макьу даркьуну. Вагу ванал Ккавкказрайнсса кIилчинмур командировка хъанай диркIун дур.
Мунал ттухь мудан учайссия: «Ттун цичIав къахьунтIиссар, ина пикри мабара. Ттул ттигу цикссагу дансса давуртту дуссар, – буслай дур Андрейл нину Мария Петровна. – Цалчин оьвкуна МахIачкъалалия. Буслай ия, хьхьиригу чIаравсса, цукун ххуйсса шагьру буссарив. КIилчин оьвкуна Новолакрая. Сентябрьданул 5-нний ялагу оьвчинна куну, махъ буллуссия». Му кьинирив Андрей Тепериклуща цIунилгу оьвчин къабювхъуна.
ЦIуссалакрал РОВД-лучIа гужсса битаву най, кIюрххил ссят 7-ннийра боевиктурал милицанал отдел ласласаву дайдирхьусса ппурттуву цаппара омоновецтал шяраваллил клубраву, цаппарагурив РОВД ябуллай буссия. Миннавух Андрейгуя усса. Андрей ивкIусса куц ттухь бувсуна ОМОН-далул командирнал заместитель Игорь Лаврентьевлул. ТIайламур бусан, ванан цанмагу гьарзат аьщуйн щунну кIулну бакъая, муния ванахьгу бувсун бия Дагъусттаннайн Андрейщал бувкIсса уртакьтурал.
— Битавуртту дайдирхьусса чIумал, — буслай ур Игорь Николаевич, — жул оьрчIру, леххаврий гьаз хьуну, клубравату РОВД-лучIан личинмур буллай бивкIун бур. Боевиктурал лагмара цIу дирхьуну, кIиккун биянгу бигьасса иш къабивкIун бур. Андрей милицанал отдел ядуллалиминнавух уссия. Му ппурттуву муналмур масъала отделданучIан кIункIу тIутIисса цалами оьрчIру кIучI баншиврул битлатавуя. Му битлатиссаксса мутталий оьрчIру хьхьичIунмай най буссия. Микку бакIрайн щусса ккуллалул Андрей унийва ивкIуну ия.
Лаврентьевлул мукунма бувсуна ца цамургу иш:
— Миккува уссия кIусса щаву дирсса взводрал командир Алексей Токарев. Мунаяту цукунни кулпатрахь бусан тIий, мадара хIаллай лахIлайгу бивкIун, цукуннугу гьан багьунни. Ганал кулпат хъинну цила цуппа бувгьусса хъамитайпа бия: «ОьрчIрув, на навагу хIакинна, най бунува тIайламур бусияра, щаву дирну дуривкьай? ТтиликIран цивхьуну бур? – куну, цаппара суаллугу буллуну: – За бакъассар, га ттуяту чунчIав къагьантIиссар», — куну жущал бувккуна. Гьарцагу омоновецнан тукунсса кулпат хьурдай тIий уссияв.
ИвкIусса ца усса ур тIий, Андрейл ниттин Мария Петровнан баяйхтува, ганин бувчIуна цила арс ивкIушиву. ХьхьичI хьхьуну ганин макIра Андрей гробраву ивхьуну ккавккун ия. Амма ганил му макI ккаркшиву я ласнахь, я гъанминнахь щихьчIав бувсун бакъая.
— Жу хъуниминнахь миннат буллай буссияв, жуяту цичIав кьюлтI мабулларди, жу гьалак буклаки мабулларди тIий, — буслай бур Мария Петровна. – Офицертал яру лабитлай бия. Итникьини гьанттайнмай ОМОН-далул хъуними гьуз увкуна му кьурчIисса хавар баян бан. Милицанал машиналущал бувкIуна «скораягу». Хъиривми гьантрай дуркIуна Рушайлал къулбас дурсса жижара буллалисса телеграмма. Андрейл хъирив Дагъусттаннайн лавгссар ОМОН-далул командир Григорий Дружкин.
— Щинни аьркинсса та дяъви? Щилли кару аьгъу дурсса ттул оьрчIал бивкIулий? – цIухлай ур Андрейл ппу Владимир Петрович Теперик. Андрей МахIачкъалалив нанийни, ивчIанссара тIий акъассия. Га лавгссия, гьунттийнин гай Липецкалийнгу къабучIаншиврул, Ватан къачагътурацIа марцI дан.
Андрей Дагъусттаннайн тIайла уклакийни, ванал 4 шинавусса душнил, Настенькал, ссурссулуха ппугу ххира уллай: «Буттай, малагара, инава тийх ивчIарача», — тIива. Туну, кьурчIисса иш бакъарив ва чIивитIул мурччава бувкмургума тIайла бацIлацIисса чIун дуркIун дуния махъ.
«Комсомольская правда»
кказитрая
Таржума З. Шаллаевал
№39 «Илчи» 1999 ш.
