Гьар шинах къатри дувултрал пишалул кьини кIицI лагай авгъуст зурул кIилчинмур бигьалагай кьини, гьашину му хъанай дур авгъустрал 11-нний. 

Дагъусттаннай, хасну МахIачкъалалив ларгсса шинал строительствалул давриву диялсса дахханашиннарду хьунуккар, агьалинан къулайссагу, къакъулайссагу. Вайннуя балжийну буслай ур 1- мур ЦIувкIратусса, ЦIуссалаккуй хъуна хьусса Шагьабуттиннул арс ХIажикьурбанов Сайдун, Дагъусттаннал лайкь хьусса строитель, мукьцIалунниха лирчусса шинну ва даврий дурсса бюхъу- опыт бусса магьирсса инженер-строитель.

— БакIрайра чIуручIаву дуванна, щалвагу Аьрасатнаву строительствалул бущи-тарг хIисавравун лавсун, МахIачкъала бивкIшиву шамулчинмур кIанттай, утти тIурча буссар кьуйлчинмур кIанттай. Циван? Строительст­валул даву дацIан дувансса къаучиннуча, хIурхIа дуккан дувансса хIукмурду бувну тIий рес­публикалул ва шагьрулул хъуниминнал. Экологиялун зарал хъанай бушивугу цIакьлин бувгьуну, лавкьуна кирпичру байсса 60 завод. Заводру лакьавривун калпушрал багьа хъинну лахъ хьуна. БучIияхха, шан-шанма, ххю-ххюва лакьлай, хIаллицIух дуван ва даву, ягу хIурхIацIакул цамур кIанттурдайн бизан буллан заводру. Гьай-гьай, дуссар строительствалул производствалуву диялсса диялдакъашивур­тту, амма строительствалул давриву дурмур, яъни гъагъан дурмур дазин оьнура захIматссар.

Баян бувна хъинну хъирив лавну ххал буллантIишиву объектру дуллансса ихтияр душиврул документругу, дур­сса конструкциярдугу техникалул тIалавшиннардацIун дар­­кь­усса, ягу къадаркьусса душиву. Ва давугу хъиннура лахъи ларгуна. Мяйжанссар, шагьрулул хьхьичIвами хъуниминнал къат­ри дуллансса ихтияр дуллуну дур шагьрулул инфраструктура хIисавравун къаларсун, цIуну дурсса къатри газрал, щинал, ттукIрал, канализациялул цукун дузал дулланссарив пик­ри къабувну. Хьун бумур хьуну, хьулуцIух бавцIукун, утти ва тагьарданува буккансса чаранну лякъин аьркинну бур.

МахIачкъалалив увкIсса Аьра­сатнал строительствалул министрнал хъиривманалгума маслихIат бувна, дур­сса къатри лекьан дуллалавугу ххирану дацIан най дунавхьур ва пайщиктуран хъуни­сса зараллу хьун най бунавхьур, чара бакъа лекьан дуван багьлагьими дакъа лекьан къадуван. ХIасил хIакьину чIярусса стройкарду дарцIуну дур, вайннул тагьар ххал даву хIурхIасса бущилий най дур, цIусса къат­ри дуллансса ихтияр ттигу дакъассар, къадагъа танийн дикIанссарив къакIулли. Агьали ххари банмургу бусан ччива гьаксса, ччясса мутталий даву сантирайн дуцинтIиссар тIисса умуд бур. ЦIуну дуллалисса къатри гьарцагу чулуха къулайсса дур, строительствалул кьараллу дурурччуну, цIакьну дуллалисса. Агьалинан циняв шартIру дузалсса къулайсса квартирарду ччай бур, миннухару зузиссагу, зунтIиссагу.

Къаххарисса асардугу цив­ппа бивтун, барча буван ччай ура ттула пишалул уртакьтал. Щил ци учирчагу, ци диялдакъашивуртту иттав кьутIларчагу, захIматшивуртту дайшишруну хьхьичIун дагьларчагу, строительтал бур агьалинан къатри, школартту, азарханарду, культуралул ва социал объектру буллалисса пишакартал. Аьрщи Аллагьнал ляхъан дуварчагу, аьрщараймур гьарзат строительтуралли дурсса. Барча зул байран, ххирасса дустал!

Ихтилат чивчуссар
ПатIимат Рамазановал