[dropcap]А[/dropcap]вгустрал 5-нний ДР-лул ХIукуматрал Председатель Артем Здуновлул каялувшиврий ххал бивгьунни «ТIюварду ва шагьрулувусса кIанттурду» тIисса национал проект дузрайн дуккан даврил масъала.

Хъунмур ихтилат бунни ДР-лул строительствалул ва ЖКХ-лул министр Малик Баглиевлул.
— «ТIюварду ва шагьрулул тагьар» (Жилье и городская среда) тIисса национал проект дузрайн дуккан даву мурадрай, Да­гъусттаннай цIакь бувссар «ДР-лул шагьрулул къулайшивур­тту», «ТIюварду», «ДР-лий ялапар хьун къабучIисса тIювардал фонд чан даву» тIисса регионал проектирдал паспортру. Ми цIакь бувну буссар «Электрон бюджетрал» системалий. Гьашину къатрал хьхьичIсса хIаятру ва жяматийсса кIанттурду дузал бантIиссар 10 шагьрулий ва 58 шяраву», — увкунни мунал .

ДР-лул ХIукуматрал Председательнал хъиривчу Владимир Лемешкол гьаз бунни давуртту дагьайсса куццуй дуллан аьркиншиврул масъала.
Владимир Ивановлул бувсунни къулайшивуртту дусса шагьрулул кIанттурду – му «Единая Россия» партиялул проект душиву ва ми давуртту барткъадиргьусса муниципал сакиншиннардал бакIчитал партиялул чулухатугу танмихIрайн кIункIу бувантIий бушиву.

БатIаврий ихтилат бунни ДР-лул ХIисаврттал палаталул председатель Билал ЖахIпаровлул. Мунал тIимунийну, ДР-лул БакIчинал тапшурлугъ бартдигьлай, дурну дур семинар-совещание. Семинарданий гьуртту хьуну бур республикалул УФАС-рал, Казначействалул госзакупкарттал комитетрал вакилтал, районнал ва шагьрурдал, мурадлув­сса министерстварттал ва идарарттал жаваблувсса зузалт. Мунал мукунма бувсунни документру къатIайлану хIадур бавриягу, дукIу, проект бартдигьлагьини, муниципалитетирттал итабавкьуну бивкIсса гъалатIирттаятугу.

-На дакI дарцIуну ура ХIисаврттал палаталул таман­сса материаллу салкьи даншиврий, ми иширттацIун бавхIуну. ДакIний битан аьркинссар ми бушиву жяматирттал итталу­сса кIанттурду ва инсантурал бищунтIишиву дурсса давур­ттан кьимат», — увкунни Артем Здуновлул.