Азирбижанная Дагъусттаннайн бизан бувну бур 130 кулпат
[dropcap]И[/dropcap]юльданул 17-нний ДР-лул БакIчинал каялувшиврий хьунни Дагъусттаннал Мюхчаншиврул Советрал батIаву.
Муний ххал бивгьунни ДР-лийсса АьФ-лул приоритетсса паччахIлугърал программартту дузрайн дуккан даврил хIакъиравусса ва ДР-лий инсантал дарурттал щаллу баврил масъалартту.
Цалчинмур масъалалул хIакъираву ихтилат буллай, ДР-лул ХIукуматрал председательнал 1-ма хъиривчу ХIажимахIаммад ХIусайновлул бувсунни национал проектру хIалану душиву паччахIлугърал программарттавух. Мунал тIимунийну, 2018 шинал 25 программа бартдигьин итадаркьуну дур аьмну 40,6 млрд. къурушрал, Дагъусттаннайсса федерал объектругу хIисавну. Республикалул паччахIлугърал ва муниципал заллушиврийсса объектирдал хIакъираву чирчуну дур 46 кьутIи, мивун дагьан дурну дур 15 паччахIлугърал программа. Республикалул бюджетру щаллу буван итадаркьуну дур 11 млрд. 94 млн. къурушрал. Харж дурну дур 94,6%. Харж къадурну лирчIсса 598,5 млн. зана бувну бур бюджетравун. Миннувату 121,8 млн. махъ бивхьуну бур, конкурсру бувну. Ихтилатчинал гьартану бувсунни бюджетрал арцу лув личIан дуван цукун бювхъуссарив.
Яла ХIажимахIаммад ХIусайновлул бувсунни гьарца паччахIлугърал программалия.
«2016-2025 шиннардийнсса ДР-лул Социал-экономикалул лябукку» тIисса подпрограммалун ва «Ухссавнил Къапкъазуллал федерал округрал лябукку» тIисса АьФ-лул госпрограммалун итадаркьуну дур 1,3 млрд. къурушрал. Ми арцух Азирбижаннал Республикалийсса Храх-Уба ва Урьян-Уба тIисса шяраваллава 130 кулпат бизан бувну бур Дагъусттаннайн. Му программалул лагрулий дурну дур цаймигу давуртту.
Хъирив ихтилат бунни ДР-лул ХIисаврттал палаталул председательнал буржру чIумуйну бартбигьлагьисса Тамирлан Расуловлул. Мунал бувсунни паччахIлугърал программартту дузрайн дуккан дуллалийни цукунсса диялдакъашивуртту ва закон лиян дурсса ишру хьуссарив ва миннул хьхьичIалу цукун кьукьин аьркинссарив.
Владимир Васильевлул бувсунни гьашинуния тинмай къуллугъчитурал буржлувшиврул хIакъираву цIусса низам дихьлахьишиву. «ХьхьичIва дурну чулийн дуккан къадурсса объектирдахлу танмихIрайн кIункIу дайссия щалла регион, республикалун итадаркьусса арцугу махъуннай ларсун. Утти тIурча, му жаваблувшиву къуллугъчитурал цайнна ласлантIиссар, административ-финансирттал чулухами жаваблувшивурттугу хIалану», — увкунни В. Васильевлул.
БатIаврий ххал бивгьунни хIаллихшиннарду дагьайсса инсантал дарурттал щаллу баврил масъалагу.
