Дагъусттан Республикалул Культуралул министерствалул щурущи дурсса «СахIналул усттартал – Дагъусттаннал агьалинан» тIисса программалул лагрулий Апанни Къапиевлул цIанийсса Лакрал паччахIлугърал драмалул ва музыкалул театрданул артистал лавгунни Лакрал, Ккуллал ва Ахъушиял районнал щархъайх гастроллай, «Чагъанттул чIурду» тIисса концертрал программалущал. Концерт ккаккан дурунни Хъювхъиял, ЦIущуллал, Хъунайннал, Хъурхърал, Щардал, Кумиял, ЧIарттал, ГьунчIукьатIрал ва Уручуллал шяраваллаву.
Зулайхат Тахакьаева
[dropcap]Ш[/dropcap]яраваллал агьалинал ххарину кьамул бунни ХIажиаьли ХIажиаьлиев, Луиза Шагьдилова, Саният Рамазанова, Халисат Батирбекова, Хидирнаби МахIаммадов ва жагьилсса артистал.
Концертирттая махъ шяраваллал администрациярттал бакIчитурал барчаллагь увкунни артистурахь.
Театрданул администрация дакIнихтуну барчаллагьрай бур ГьунчIукьатIрал, Хьурттал ва Уручуллал щархъал бакIчитурайн, концертрайн тамашачитал батIин кабакьаврихлу.
«Лакку балайрду» тIисса концертрал программа ккаккан дурунни МахIачкъалаливгу, Аьрасатнал шагьрурдая отпускардай бувкIсса ватанлувтуран хас дурну.
[dropcap]Т[/dropcap]еатрданул артистурал бакъасса, ялагу балайрду увкунни жагьилсса балайчитурал: Дагъусттаннал паччахIлугърал университетрал актертал хIадур байсса факультет хьхьичIунну къуртал бувсса РавхIаният Зайпуллаевал, Диана Кьадинаевал, ЦIаххай МахIаммадовлул.
ХIакьину тIурча театр цIунилгу наниссар Лаккуйн «Даркку Дагьантту» программалущал.
