«ЦачIуну зунну агьамсса масъаларттаха»

Ростехнадзорданул Къапкъазуллал управлениялул каялувчинал хъиривчуну
ивтунни Артур Амуттинов

[dropcap]И[/dropcap]юльданул 19-нний ДР-лул БакIчи Владимир Васильев хьунаавкьунни Экологиялул, технологиялул ва атомрал иширттал ялув бацIаврил (надзорданул) Федерал къуллугърал

Къапкъазуллал управлениялул каялувчи Халидбаг Алхасовлущал ва мунал хъиривчу Артур Амуттиновлущал.


Халидбаг Алхасовлул тIимунийн бувну, цIуну ивтсса хъиривчунал зузи кIануну хъанай бур Дагъусттан Респуб­лика ва мунал каялувшиву дуллан тIий ур Управлениялул цаппара отделлал давурттай: энергетикалул ва гидротехникалул сооружениярттал ялув бацIаврил, паччахIлугърал строительствалул ва ­хъу­с-кIушивуртту гьаз дайсса механизмардал ялув бацIаврил, аьмсса промышленностьрал ва зунттал давурттал ялув бацIаврил, мукунна правалул щаллу баврил ва лицензиярттал иширттал ялув бацIаврил давурттай.

Халидбаг Алхасовлул бувсунни Артур Амуттинов 30 шинал мутталий ДР-лул Мюхчаншиврул къуллугърал управлениялий зий ивкIшиву. Микку зузи­ссаксса хIаллай мунал каялувшиврулу щаллу бувну бивкIшиву цаппара агьам­сса масъалартту ва мунан цимиллагу дуллуну диркIшиву лавайсса даражалул наг­радартту.

ЦIуну къуллугърай ивтманан хьхьи­чIуннайшивурттугу чIа куну, Владимир Васильевлул бувсунни Ростехнадзорданул лагрулий бушиву тамансса агьам­сса масъалартту. «Жунма аьркинни чялишну ва системалийну зун, Дагъусттаннал ялапарлувтал нигьачIаву дакъа зий-зананшиврул», — увкунни республикалул каялувчинал.
Дагъусттаннал БакIчинал бувсунни республикалул душиву тамансса ялун чIалачIисса каширду, цIанасса ппурттуву гьарца аралуву чан-чанну тIий низам дихьлай бушиву. Мунал бувсунни газрал сетирдал аралуву инвентаризация дурну душиву ва цаймигу давуртту дуллай бушиву. «Жул вийн хъунмасса умуд бур. ЦачIу зунну ми агьамсса масъаларттаха», — увкунни Владимир Васильевлул.

«Илчи» кказитрал коллективрал чулухатугу барча буллай буру Михаиллул арс Артур Амуттиновлул цIусса къуллугъ ва чIагу тIий буру цIу-цIусса тIайлабацIуртту – даврийгу, оьр­мулувугу!
«Илчилул» редакция