Июльданул 23-нний ДР-лул БакIчи Владимир Васильевлул каялувшиврий хьунни нюжмардий цал шайсса агьамсса социал масъаларттал хIакъиравусса батIаву.
Миннувух ххал бивгьунни республикалий «Земский доктор» тIисса проект дузрайн дуккан даврил масъала.Му масъалалул хIакъираву хъунмур махъ лавхъунни ДР-лул цIуллушиву дуруччаврил министр Жамалуттин ХIажиибрагьимовлул. Мунал тIимунийну, цIуллушиву дуруччаврил системалул ххуй-хъиншиврул даража чIалачIи байссар пишакартал щаллуну бушиврул, ми хъинну хIадур баврил ва кIулшиврул даражалул.
Шяраваллил кIанттурдай духтуртал биялну бушивруву ляличIисса кIану бугьлагьиссар «Земский доктор» (кIанттул духтур) тIисса программалул. Ххюра шинал мутталий, му программа бартдигьлай, давурттайн увцуну ур 1080 хIакин. 2018 шинал республикалул цIуллушиву дуруччаврил системалий зий ивкIун ур 10233 инсан, миннавату шяраваллаву – 3408 духтур. ХIакьинусса кьинигу шяраваллаву иялну акъар 421 хIакин. Яла аьркинми бур оьрчIал хIакинтал, терапевтътал, рентгенологтал, фтизиатортал, анестезиологтал – реаниматологтал. Гьашину му программалийну шяраваллил кIанттурдай зун уцин най бур 224 духтур ва 10 фельдшер.
Министрнал тIимунийну, шяраваллавун зун бувцусса хIакинтал тиккува личIаншиврул, ми аьркинну бур дузал буван яхьунсса къатрал ва цаймигу социал хIаллихшиннал.
Дагъусттаннал БакIчинал тапшур бунни жагьилсса пишакартал шяраваллавун кIункIу баврил давуртту гужлан дуван, социал рекламагу ишла дуллай.
