Июльданул 11-нний ДР-лул БакIчи Владимир Васильев хьунаавкьунни цIуну къуллугърай ивтсса ДР-лий ТанмихIру бартбигьаврил Федерал къуллугърал управлениялул хъунама Андрей Поляковлущал.
Виваллил къуллугърал полковник Андрей Поляков цIусса къуллугърай ивтссар АьФ-лул Президент Владимир Путиннул ХIукмулийну июльданул 3-нний.
Аьрасатнал ФСИН-далул мюхчаншиврул управлениялул хъунама Андрей Шмидкол бувсунни Андрей Поляковлул хъунмур къулагъас дуллантIисса масъаларттая: «ЦIусса каялувчинал хьхьичI бивхьуссар аьдлу-низам ва законшиву дуруччаврил хIакъиравусса масъалартту.
Андрей Шмидкол тIимунийну, Андрей Поляков зий ивкIссар Волгоградрай ва Краснодардай личIи-личIисса къуллугъирттай. 2015 шиная цIанасса чIумалнин зий ивкIун ур ТанмихIру бартбигьай Федерал къуллугърал хъунмур оператив управлениялий.
Владимир Васильевлул умуд бивхьунни Андрей Поляковлул даврий хъинчулийсса дахханашивуртту хьун дулланшиврийн.
