Ккуллал райондалул тарихраву хъунисса давур­тту дурну, цалла цIарду чирчу­сса инсантал хъинну чIявусса бур.

Ми жунма тачIав хъамабитан къабучIиссар. ХIатта ва хъуначу Ккуллал райондалий къуллугъирттай зий ивкIсса шиннардий нава ший яхъанай къаивкIун ухьурчагу, ваная ттун шагьрулийнгума баяйва, Ярагъи МахIаммадов тIий. Вана утти, Лаккуйн яхъанан увкIун махъ на гъанну кIул хьура ванащал. Ванал Ваччавсса къатрал нузру муданна хъамаличунах ялугьлайннари дусса.Явара дурагу къалакьайссар. На тIайланма учинна, ва адаминащал кIул шавриву на бюхъай «дурххунугума» дикIан. Ярагъи МахIаммадовлуйн бунияла учин бучIину бур Хъуначу куну. Ва ур 1925-ку шинал увсса, цувагу ЦIуйшиял шяраву.
Уттигъанну, Ваччату ахьтта шавайн най, Хъюйннал шяравун иявайсса чIумал, чIарах бувккун нанисса чIиви машина навагу уцин бацIан баншиврул ка гьаз дурссия. Рульданух ия жагьил. Ганащал ихтилат буллай унува, ттун га цIана ххал хьуна ганал чIарав щяивкIсса Ярагъи.

Ххал барча, гай най бия Хъунне­ххайхсса ламу буллалиминначIан биян. Рульданух щяивкIсса жагьилгу Ярагъинал душнил Элеонорал арс ия, Москавлив медициналул элмулул кандидат хьуну, Африканаву зузисса. Гьай-гьай, нагу щяивтунав вайннал машиналий.
Яла ламучIа жун бакIрайн багьуна: гикку зузисса Ваччиял шяравасса геодезист Ися Исяев, ламул давурттай каялувшиву дуллалисса Къяннал шяравасса Агъаев Алим, крановщикну зузисса ЦIуйшиял шяравасса Аьбдуллаев Нуруллагь. Хъама­къабитулун рирщуссия суратгу. Ххишалдаран, на гайннал шавайн Вихьливгу иян увнав.
ХIурмат ххисса Ярагъий МахIаммадович, итаннав ина Заннал 100 шин хьуннин. Гихунмайгу яла чIаланссар.

ХIажимурад ХIусайнов