Шахматирттай буклан лахьхьин бан

[dropcap]И[/dropcap]юльданул 12-нний ДР-лул БакIчи Владимир Васильев хьунаавкьунни шахматирттай буккаврил чIявуссалийла дунияллул чемпион, АьФ-лул ПаччахIлугърал Думалул депутат Анатолий Карповлущал.

Хъамаличунахь аьла-ссаламгу бувну, Владимир Васильевлул цIувххунни республикалия бив­сса асардая. Анатолий Карповлул тIимунийну, га цалчин Да­гъусттаннайн увкIун ур 2004 шинал, МахIачкъалаллал шахматирттал школа тIитIаврий гьур­тту хьун. ЦIанасса ппурттуву мунил гьанулий зий бур А. Карповлул цIанийсса шахматирттал школа. Миккун занан ччисса цIана ур сайки 150 оьрчI.

Анатолий Карповлул тIимунийн бувну, АьФ-лул ду­ккаврил министр Ольга Васильевал пикри бур шахматирттал чара бакъасса дарс школалул программалийн ласун. ЦIанасса ппурттуву Тюменнал улклуй 350 школалий ва 80 оьрчIал багъраву лахьхьин буллай бур шахматирттай буклан. Миннал низамгу цIакь хъанай дур, дуккавриву хьхьичIуннайшивугу хъанай дур. Миннал эбрат ларсун дур США-нал Галермуллал школалия.
Шиккува бусан, МахIач­къалаллал Карповлул цIанийсса школа хъанахъиссар Да­гъус­ттаннай ва СКФО-рай яла хьхьичIунмурну.