А. Къапиевлул цIанийсса Лакрал паччахIлугърал музыкалул ва драмалул театдануву хъунмасса тIайлабацIу буну хьунни Н. В. Гогольлул «Ревизор» произведениялиясса спектакльданул премьера.

Зулайхат Тахакьаева
Оьруснал классикалул литературалуву лайкьсса кIану бувгьу­сса ва социал сатиралул эбратну хьусса «бивкIу бакъасса» комедия ххал бан увкIун ия цува Республикалул БакIчи Владимир Васильев. Ванащал бия: ДР-лул БакIчинал ва ХIукуматрал Администрациялул каялувчи Владимир Иванов; ХIукуматрал хъунаманал цалчинма хъиривчу Анатолий Карибов; Халкьуннал Мажлисрал хъунаманал хъиривчу Елена Ельникова; культуралул министр Зарема Буттаева; МахIачкъала шагьрулул мэр Салман Дадаев, Лакрал райондалул бакIчи Юсуп МахIаммадов, цаппарасса министерствардал ва ведомствардал каялувчитал, депутатътал, магьирлугърал иш­ккаккулт.

Спектакль байбишин хьхьичI Владимир Васильевлул ххал дурунни Дагъусттаннал магьирлугъ хьхьичIуннай давриву захIмат бивхьусса Лакрал театрданул артистурал суратру ва личIи-личIисса шиннардий бивхьусса спектакльлавасса лахIзарду ккаккан буллалисса суратирттал галерея.

Спектакльданул режиссерну ур Аьрасатнал халкьуннал артист Руслан Хакишев. Сценограф – Да­гъусттаннал Халкьуннал художник Ибрагьим-Халил Супиянов; хореограф – Аьрасатнал лайкь хьусса артист Муса Оздоев; касттунну – Фатима ХIажибековал.
Спектакльданувух гьурттуну бия М. Горькийл цIанийсса Оьрус­нал драмалул театрданул актерталгу. Агьамми роллу дургьуну бия МахIаммад Сурхатилов (Городничий); Аслан МахIаммадов (Хлестаков); Саният Рамазанова (Анна Андреевна); Зинаида Чавтараева (Мария Антоновна); Аьбдул Мурадов, Ислам МахIаммадов, Ибрагьим Рабаданов.

Комедиялух буруглагийни, хьхьичI бацIлай бур хIакьинусса оьрму, кIиттуршуннийн диявай­сса шинну ларгнугу. Гогольлул дащуй дихьлай ивкIсса цимурца жула яруннил хьхьичIгу хъанайнна дур. Мунияту багьхьунссар «Ревизор» «бивкIу бакъасса» произведениярттал ххуттавун.
КомедиялучIан кIура баллай бур билаятрал чIявусса ттизаманнул театрду. ЧIарах къабувккунни дунияллул классика муданнагу хьхьичIххуттай дусса Лакрал театргу.
Пьесалул цалчинсса премьера хьуну бур 1836 шинал Санкт-Петербургуллал Александринский театрдануву. Гогольлул дащуй бивхьусса къуллугъчитурал комедия бухьттандалун ккалли бувну бивкIун бур.

«Пьеса ххал баракьай!» — увкуну бур спектакль ххал бан увкIсса император Николай Цалчинманал. Амма ци бухьурчагу, спектакльданий дакI даркьуну, гихунмай бихьлансса ихтияр дуллуну дур.
ДакI даркьунни жулама БакI­чинангу Лакрал театрданул спектакльданий. Къуртал шавривун, лавай ивзун хъатгу ришлай ия.
Спектакльданул лакку мазрай­сса премьера хьунтIиссар ва зурул 31-нний 18.30 ссятраву.