[dropcap]М[/dropcap]айрал 21-нний Дагъусттаннал БакIчи Владимир Васильев гьуртту хьунни АьФ-лул ХIукуматрал Председательнал
1-ма хъиривчу – АьФ-лул финансирттал министр Антон Силуановлул дуллалисса видеоконференциялул журалийсса батIаврий.
Муний ххал бигьлай бия АьФ-лул национал проектру (программартту) дузрайн дуккан даврил масъалартту.
БатIаврий бувсунни АьФ-лул субъектирттал лаваймур даражалул къуллугъчитурал ва ишру бартбигьаврил властьрал давурттан кьимат бищаврил хIакъираву. Мукунма ххал бивгьунни регионал проектру дузрайн дуккан даврил мониторинграл масъалартту.
БатIаврий махъ лахълай, Антон Силуановлул увкунни: «Жува цIанасса ппурттуву федерал даражалий национал проектирдаха чялишну зийгу бухьукун, жулла давурттаясса мюнпат чIалантIиссар АьФ-лул регионнай дуллалисса давурттайну». Мунал субъектирттал бакIчитурахь маслихIат бунни му ххуллий дуллалисса давуртту анавар дуккан дуван.
Дагъусттан Республика 2019 шинал гьуртту хъанай дур 48 федерал проект ва 10 национал проект бартдигьавривух. 2020 шиналсса пландалий бур гьуртту хьун ялагу 5 федерал проектравух.
«Элму» тIисса проектран хасну, цIанасса ппурттуву зий бур республикалул вузирдащал ва элмийсса идарарттащал, жулла республика конкурсирдай гьуртту хъананшиврул.
Гьашину ДР-лий национал проектру дузрайн дуккан даврил лагрулий зий байбишин тIий бур 20 оьрчIал багъ ва 12 школа (цинявппагу «Дуккаву» тIисса нацпроектран хасну 23 школа бан тIий бур).
БатIаврий гьуртту хьунни мукунма ДР-лул БакIчинал ва ХIукуматрал Администрациялул каялувчи Владимир Иванов, ДР-лул ХIукуматрал председательнал цалчинми хъиривчутал Анатолий Карибов ва ХIажимахIаммад ХIусайнов ва цаймигу.
