Май зурул 21-нний Владимир Васильев бакIчисса делегация республикалул Муфтиятрай хьунабавкьунни муфти АхIмад Апаннинащал ва ванал уртакьтуращал.

П. Рамазанова
Делегациялувух бия ДР-лул ХIу­куматрал ва Дагъусттаннал БакI­чинал администрациялул каялувчи Владимир Иванов, ХIукуматрал председательнал хъиривчу Рамазан Жяъпаров, Национал политикалул ва диндалул иширттал министр Энрик Муслимов ва цаймигу къуллугъчитал. Циняв гьуртту хьунни тиккува Централ мизитраву, «Инсан» тIисса ихIсандалул фондрал сипталийну гьар шинах зума итадакьин тIитIайсса ссупралухсса мажлисрайгу. Мубараксса Кьурандалул луттиравасса аятирттах вичIи дирхьуну махъ, агьали барча буллалисса ихтилат буллай, Владимир ­Васильевлул кIицI лавгунни дагъусттан агьалинал я бацIанмур хасият – кувннал кув бугьаву душиву, 20 шинал хьхьичI респуб­лика террористътурацIа марцI дуккан дувангу ца хьуну гьаз хьушиву. Барчаллагь кунни ванал рувхIанийсса даврихлу муфтинахьгу. «Жулва аьмсса мурад — агьалинал оьр­му ххуй бувавур» — кунни В. Васильевлул. Муфтиналгу цалвамур ихтилатраву кIицI лавгунни республикалул хъуними ххуй­сса давурттацIун кабакьлай бушиву. Гьаз бунни, ххуллурдай апатIру къахъанан, ххуллийсса низам дуруччин аьркиншиврул масъалагу. АхIмад Апаннинал «Инсан» фондрал цIаниятусса Барчаллагьрал чагъаргу буллунни республикалул хъунаманахьхьун.