Дакъассар ссугру, байбизавуртту

ЦIунилва-цIунил мукIру хъанай бура хияллу чаннасса, дакI чумартсса инсаннахун хъиншивуртту, ххуйшивур­тту дан цичIар къадахчайшиврийн.

Ца ххаллилсса даву уттигу дунни миллат цачIун буван, тарих, лакку маз хъамакъабитан шаймур буллалисса Къянияту­сса Эдуардлул (социал сетирдай Хан Леков).
Лак цачIун баву, цаннащал ца лакку мазрай гъалгъа тIутIаву мурадрай, социал сетирдай «Марц1сса лакрал жямат»тIисса группа «Ватсабраву» ва «Однок­лассникираву» хIасул бунни. «Хан Леков» т1исса лажингу дачин дурну ур ччянива . Яла «Ватсаб» группалуву дуссар программа гьарца кьини гъалгъа т1ун­сса. Ванал группалуву бур личIи-личIисса шяраваллавасса, шагьрурдаясса, дазул кьатIувссагума лак, личIи-личIисса оьрмулул, пиша-сянатрал инсантал. Буссар, дуссухалу бувсса кунма, хьхьувай куннащал кув жап­рай, дакIниймур кIибачIлай, маслихIат ккаклай, хIатта ташурду бангума кьаст лахIлай. Да­къассар ванал группалуву рихшантру, ссугру, байбизавур­тту. Администратортурал баян бувссар мукунсса инсан га цIана группалува уккан антIишиву.

Ттигъанну ва группалул «Олимп» кафелуву хьунабакьаву дунни. Группалувусса чIявуми кувннан кув кIулсса бакъанугу,нукIува кIулну бивкIсса куннасса дусшиву дайдирхьунни. Ихтилатру бур аьчухсса, хъярч-махсарттайсса ва хъунмурчIин тIааьнсса лакку мазрайсса. Маз ххуйну къакIулмагу ниттил мазрай ихтилат бан хIарачатрай уссар. Маз ишлану къакIулли тIутIиманахьгу «Илчи» кказит чича, ккалакку тIий буссар!..

— Бивзрув, бурув! Барачатсса, даркьусса кьини хьуннав!
— Ссалам аьлайкум, лакрал жямат! Цукун буру? Зун хавар ххуйсса баяннав, кьатIув бувкми Аллагьнайн аманат хьуннав!
— Бивзрув, бурув, ххира лак! Дуниял тIитIивухъул, дулла­лимуницIун Аллагьнал кабакьивухъул. Зуй барачат бишиннав, дакIниймур бартлаганнав, цIуллушиву дулуннав!

Укун байбишайссар группалувусса жап.
Ккулув, цIу дагьну, къатран зарал шайхту, ва группалул дарт1унни кумагран 35 азарда къуруш ва дуллунни къатрал залуннахьхьун . Эдуардлул дуллантIисса даврил планну чIярур.
Гъинттул Лакку билаятрайн экскурсия бан ччай бур ва Ппабак1уйн лахъан ччай бур вайннал группа. Ва ялагу, группалуву дуссар гьаз дайсса темардал низам.

1. Итни кьини —  халкьуннал даруврал урттуя. 
2. Тталат- лакрал тарихрая. 
3. Арвах1- назмурду, учаларду, ссигъри. 
4. Хамис- дяъвилий талай бивк1минная ва дунияллийх ц1а ларгминная.
 5. Нюжмар- динналия суаллу ва жавабру. 
6. Ххуллун- жула миллатрал аьдатру, лаххия ва лакку маз ябаву. 
7. Алх1ат- лакку мазрал дарсру.
[dropcap]В[/dropcap]ай укунсса темарду аьч дуллалийни, жун чIявусса затру лахьлай бур. Ихтилатру бачIвасса бакъарча группалуву, хайр-мюнпатрансса бур. Жу дакIнихтуну барчаллагьрай буру Эдуардлуйн ва дуллалимуниву тIайлабацIу чIа тIий буру.

ХIурия Ибрагьимова