Дагъусттаннай ливчIун ур 123 дяъвилул ветеран

ЦIана жулла республикалий ливчIун усса ур Хъун дяъвилул 123 гьурттучи. Миннава ВТБ Медициналул страхованиялул Дагъусттаннаймур филиалданий цала цIуллу-сагъшиврул страхованиедурну дур 27 ветераннал. Ва сияхIрайсса 6 ветеран МахIачкъалаллал поликлиникарттайн агьайсса ур, ливчIсса 21 ветеран республикалул гайми муниципалитетирттал поликлиникарттайсса хIакинтурал аякьалулу ва къулагъасралу бур.


З.АьбдурахIманова
Медициналул идарарттай вай ветерантал ва мушакъатми зуруй цал ххал бувай­ссар хIакинтурал, ва дачIи шинай цал минначIан шаппа-шаппайн цумур-цагу цIунцIиялулсса бай­сса хIакинтал бияйссар. Миккура аьркинсса хъиривлаявурттугу дувайссар.

Дагъусттаннаймур филиалданул зузалтрал, телефондалувух 27 ветераннахьхьун суаллу буллуну, цалла даврия, зузалтрая, дуллалисса хIаллихшиннардая ва бучIан байсса дарурттая рязину бурув, бакъарув тIисса цIухху-бусу бувну бур. Вагу вайннал даврицIунсса ца тIалавшинна дур. Бугьарасса, чIаравнал кумаграх мюхтажсса агьлу бушивугу хIисавравун лавсун, цIухху-бусугу хъунмурчIин ветерантурал арс-душру, мачча-гъанми гьурттуну бувну бур. Ва цIухху-бусулуяр махъ, ветерантурал чулухасса тавакъюрайну, страхованиялул пишакартал бивну бур Дагъусттаннал Огнилий­сса , Ахттиял, Рутуллал, Табасараннал, Бущихъиял, Аьхьхьа­хъиял районнайсса ва Новолакстройрайсса Хъун дяъвилул гьурттучитурачIан.

Дагъусттаннал филиалданий гьарца ветераннан цуку-цукунсса медициналул хIаллихшиннарду дурссарив, ци журалул кумаг ттинин бувссарив чивчусса «паспортругу» бувну бур.
КIулсса куццуй, ялунчIил жула билаятрай Хъуннасса Ххувшаву ларсун 75 шин хъанахъи­сса байран кIицI лагантIиссар. Гьарцагу ветераннан ва байран хьунадакьинсса цIуллушивугу чIа тIий, филиалданул зузалт хIадурну бур вания гихунмайгу вайннаха аякьалий, бацIан.
Гьарцагу журалул аьркинсса кумаг, ягу медициналул полис дуван ччисса ветеран ухьурча, оьвчин бюхъайссар ва телефондалий: 64-03-34 ягу бучIан бю­хъайссар Шамиллул цIанийсса кучалийсса 36 «л» идаралийн.