Ина ияв зунттал нарт

(Булатов Идрис увсса кьинилун хасну)

[dropcap]М[/dropcap]абикIарача журналистнан цала ватанлувтурал, кIулминнал тIайлабацIурттая чичин нясивну лякъавуксса хъунмасса талихIгу, лагма-ялттунайн ливксса бала асар шавуксса, му балаллуя я тийнмай бан къабюхъавуксса хъуннасса кьурчIишивугу цамур.

МабикIарача щия-бунугу аьпалул махъ чичин дакIний, мунал суратру ххилтту дуллаврияр ламусъсса ишгу цамур…
Ца ххирассияча ттун магьри. Ми ккалай бунуваяв шанухьхьунгу лагайсса. Лапва ххуй бизайссия нартътураями, «нарт» тIисса мукъул мяъна цурда къакIулну диркIхьурчагу. Къаишла бан багьссар му махъ сайки кьуния ххюра шинал лажиндарай чирчуцири макьаларттаву цалагу. Лакрал РОВД-лул зузала, полицанал хъунама лейтенант Булатов Идрислущал кIул хьувкунни ттун «нарт» (рыцарь) тIисса мукъул мяънарагу дурчIусса.

[dropcap]И[/dropcap]нсан къуллугърал уллалисса, полицанал зузалалмур цIа тIурча щяв дагьсса заманнай, Идрис — укунасса полица, ия чIявучил дакIурдиву дахIалай чинсса кIану бугьан бювхъусса, «ч\ивима» ягу «хъунама уссин» ккаллисса зунтталчу.
Каши ххисса Заннал сахаватлувну дуллуну дия ванан яла ххуй-ххуйми хасиятру. Бургъил гъилишивугу, ссавнил илкиншивугу цал архIал цивун ларгсса Идрислул гьартасса дакI мюхтажнура дикIайва цана цалчин ккаклакисса инсанналгума хIурмат бан. ХIалалъя, махъ бакъа хIалалъя, зунттал бюхттулшиврийсса яхIлийхгу, ппухълунная дирсса къириятрайхгу заманалул хьхьури лаххан къаавцIусса чувнайн НАРТ учин.

Бакьлай бияв зу — цIа вицIунгу, ина цIаницIунгу, Идрис — «эбратрансса» — мукунсса угу ияв ина, ччиманал жула хьурдай учинсса. Амма… Лявкъунни вин луркIан дукканмигу. Ттигу лаласун бюхълай бакъара, яхIлийнгурив ккулла тIайла бацIайсса?! Ина увсса кьини барча ан кIанай, аьпалул махъру чичлан багьунни. Цибави, туну. Алжаннул ххари аннав ина, чIявучил куна, ттулгу чIивима уссу Идрис! РухI хъинний дишиннав вил! Полицанал пиша язи бугьаврияр ххисса душманшиву щалла дунияллунгу, инсаниятрангу цамур къадурссарча ина.