Низамрал ва мюхчаншиврул къаралданий

Ххувшаврил байрандалул мероприятияртту наниссаксса хIаллай жяматийсса низам ва мюхчаншиву дуручлай бия 500-нния ливчусса Росгвардиялул зузалт ва аьралитал.

ХьхьичI гьант­райгу, байрандалул кьинигу вай зий бия укуннасса чIумуйнияр чялишну. Вайннан жяматийсса кIанттурдай низам ва мюхчаншиву дузал дан багьлай бия.
Шадлугърал мероприятияртту дайдишин хьхьичI кинологтурал хасъсса техникалущал ва ккаччащал ххал бунни мероприятияртту хьунтIисса ва лагма-ялттусса кIанттурду, пIякь учайсса затрурагу дакъарив кIул бан.
Хъуннасса къулагъасралун лавсун бия агьали сайрданийн буккайсса кIанттурду.
Республикалий хьусса шадлугърал мероприятиярттай аьмну гьуртту хьуну бур 50 азарунния ливчусса инсантал, МахIачкъалалив «БивкIу ба­къасса полкрал» кьюкьлувух гьур­тту хьуну ур 16 азарунния ливчусса инсан.
Вари чинсса низамрава бувк­сса ишру вай гьантрай къавхьунни.

Вайннал цаллагу хъунна дунни кьюкьа

Ххувшаврил кьини 200-нния ливчусса Дагъусттаннал Росгвардиялул управлениялул зузалт ва аьралитал цала хъунама, полициялул генерал-майор МахIаммад Баачиловлущал гьуртту хьунни «БивкIу бакъа­сса полкрал» акциялувух.
Акциялувух мукунма гьуртту хьунни къуллугърал бурж биттур буллай жанну дуллусса зузалт­рал щахъами ва оьрчIру. Вай лавсун най бия Хъун дяъвилий талай бивкIсса гъанчунал­сса дакъассагу, къуллугърал бурж биттур буллай жанну дуллусса коллегахъал суратругу.
Росгвардиялул управлениялул медициналул къуллугърал хъунама, полициялул майор Шимали МахIаммадов увкIун ия кIивагу душгу бувцуну, дяъвилий талай ивкIсса цала ттаттал АхIмад Буттаевлул суратгу ларсун.
— На гьарица шинах гьур­тту шайссара «БивкIу бакъасса полк­рал» акциялувух ва гьар мудан буцайссар ттула оьрчIругу. Жагьилсса никиран жула билаятрал тарихрал къучагъсса ва пашмансса лажинтру кIулну дикIан аьркинссар, — тIий ур жагьилсса хIаписар.

Балайлулгу бивтссар дяъвилул ххуллу

Хъунама лейтенант Илияс Бектемировлул каялувшиндаралусса Росгвардиялул Ухссавнил Ккавкказуллал округрал аьра­ли оркестрданул ккаккан дунни концертру МахIачкъалаллал майданнай, республикалул ВУЗ-ирдаву ва ССУЗ-ирдаву. Аьрали артистурал тIутIисса дяъвилул балайрду мукссава хъинну бювххуннихха тамашачитуран, вай кьакъабагьавай, хъатру ришлай бия.
Лениннул комсомолданул цIанийсса паркравун бигьалаган бувкIми гьарца шинах бучIайсса аьрали артистурах ссавур дакъа ялугьлай бия. Концерт дайдишайхту, мюрщимигу, хъунимигу, артистуращал хIала бувххун, балайрду тIий, къавтIий байбивхьуна. Махъва-махъ артистуралгу, тамашачитуралгу щаллу бувна цинявннан ххира хьу­сса «Ххувшаврил кьини» тIисса балай.
— Дяъви байбивхьуну цал­чин­сса кьинилия бюхттул­сса Ххувшаву ласуннинсса ххуллу бивтссар балайлулгу саллатIнащал архIал. Балайлул кумаг байсса бивкIссар дяъвилул захIматшивуртту ла­хъан, гьавас бутайсса бивкIссар аьралитуравун. Жул мурадгу инсантуран вай аьрали балайрдал цуксса хъар лархъссарив дяъвилул шиннардий ва цуксса агьамшиву дуссарив миннул хIакьинусса кьини ккаккан бавур. ХIакьину жува укун лахъа-хъунну, бусравну хьунабакьлакьавугу – вай балайрдал кьимат ялавай къашаврил барашиннану чIалай дур, — тIий ур Илияс Бектемиров.

Пишалул байран

Росгвардиялул управлениялул хъунама МахIаммад Баачиловлул барча бунни МВД-лул медсанчастьрал медсестрахъул, миннал пишалул байрандалуцIун бавхIуну.
Цала ихтилатраву ванал кIицI лавгунни ва къуллугърал цуксса хъуннасса хъар лахълай буссарив агьалинал цIуллу-сагъшиву дуруччаврил цIаний.
— Ттун цимилагу зуйн уккан багьссар, зул кумаг аьркин хьу­ссар. Ттун щиннияргу кIулли зул къуллугърал захIматшивуртту. Хъунмасса барчаллагь тIий ура жула зузалтраха ва аьралитураха дуллалисса аякьалухлу, захIматрах ва ссавурдахнулу, — увкунни ванал.
Давриву хьхьичIунсса мед­сест­рахъан дуллунни грамотар­тту ва тIутIал кацIру.

Лавхъунни «Аьпалул чирахъру»

Росгвардиялул зузалт гьуртту хьунни «Аьпалул чирахъ» тIисса акциялувухгу. Акциялул сакиншинначину хьунни Да­гъусттаннал Виваллил иширттал министерство. Мукунма ши­кку гьуртту хьунни Дагъусттаннал ХIукуматрал председатель Артем Здунов, МЧС-рал, ветерантурал организациярттал вакилтал, студентътал, дуклаки оьрчIру.
Мероприятие хьунни Лениннул комсомолданул цIанийсса паркраву. Гьурттучитурал лавхъсса чирахъирттайну чивчунни «ДакIний буссару» («Помним») тIисса махъ.
Дяъвилий жанну дуллусса миллионну инсантурал аьпалун баян бунни минутIрайсса пахъ багьаву. Яла дирхьунни тIутIив Аьраличунал гьайкалданучIа. Ахирданий гьаваллавун итабавкьунни Георгиевлул ленталул рангирдайсса шарду.

ХIадур бувссар
Андриана Аьбдуллаевал