Абадлий дакIний личIантIиссар

Ххаллилсса Ххувшаврил парад хьунни май зурул 7-нний Ккур­ккуллал шяраву. Бюхттулну лехлахисса дяъвилул балайрду баллай бия кIюрххила гьарица къатлувун.Байрандалун хасну чIюлу бувну бия щарнил ккурчIа. Дуккан дурну дия Аьрали савлугърал музейрал экспонатру – ЯтIул ттугъ, Ватан душманная дуручлай бивкIсса 129-гу ккуркличунал суратру ва гьарнан хас бувсса альбомру. КIира Славалул ордендалул кавалер Сунгъуров Сунгъурдул къатрал хьхьичI сакин бувну бия ванан хас бувсса мурцIу.


Андриана Аьбдуллаева
Байрандалий гьурттушинна дан бувкIун бия бусрав­сса хъамал: Машинартту баврил ва сервисрал колледжрал директор, АьФ-лул лайкь хьусса учитель МахIаммад-Расул Муслимов, колледжрал муаьллим Анжелика Мусаева ва педагог-организатор Гюльсенем Мирзоева цила художествалул самодеятельностьрал коллективращал. Ва коллективрал гьарица шинах чIюлу дайссар Ккурклив­сса Ххувшаврил байран. Ккур­ккуллал кьини хъун дан мукунма бувкIун бия Лакрал райондалул кIулшивуртту дулаврил управлениялул хъунама Явсупа ХIамзаев, Мариян Дандамаевал цIанийсса Гъумучиял магьирлугърал школалул директор МахIаммад Хъунбуттаев, Культуралул управлениялул хъунаманал хъиривчу Лида Кьурбанова, лакрацIун бавхIусса цинявппагу иширттаву чялишну гьуртту шайсса Аслан Къажлаев, авгъанец Гъапур Оьмариев.

Байрандалул сакиншинначи Даниял Магьдиевлул гьарица шинах байрандалий гьурттушинна дан оьвчайссар дяъвилий талай бивкIминнал ва зана къавхьуминнал оьрчIайн, уссур-ссуннайн. Гьашинугу Ххувшаврил парадрай гьур­тту хьунни Сунгъуров Сунгъурдул арс МахIаммад, Гарайханов Юсуп­лул душ Анисат, ХIасанов МахIаммадлул душ Сарзинат, Буттаев МахIаммадлул душ Галина.
Байрандалул мажлис тIитI­лай, ихтилат бунни Даниял Магьдиевлул. Ванал кутIану бувсунни Буттал кIанттул цIанийсса дяъвилул тарихрая, ватан душманная дуручлай къучагъну талай бивкIсса Ккурккуллал вирттаврая, барчаллагь увкунни ва кьини хъун дан бувкIсса цинявппагу хъамаллурахь. Хъирив шяраваллил майданнив дацIан дур­сса, дяъвилия зана къавхьуминнал цIарду чирчусса, лухIисса мармарчарил гьайкалданучIа бивхьунни тIутIал шалкри.

Дуклаки оьрчIал бюхттулну кIицI дунни дяъвилия зана къавхьу­сса 57-гу ккуркличунал цIарду. Ихтилат­ру бунни хъамаллуралгу. Бю­ххансса махъ лавхъунни дяъвилий талай ивкIсса 129-гу ккуркличунан цIа куну шеърирду чивчусса Ханича Аьлиевал.
Хъирив шяраваллил майдандалул лагма бувккунни «БивкIу бакъасса полк». Шикку кIицI бан, ва журалул акция щалагу билаят­рай буллай байбишиннин, цимирагу шинал хьхьичIва Ккурккуллал шяраву дуллай бивкIссар.
Ххувшаврил парад хъиннура чIюлу дунни Машиностроениялул ва сервисрал колледжрал художествалул самодеятельностьрал коллективрал ва райондалул Культуралул управлениялул зузалтрал хIадур дурсса концерт­рал программалул.