ТтучIа шаппа чарттал биялсса коллекция салкьи хьуну буссар

Дя-дянийх «Ци лирчIун дия вил, Зиябуттин, дунияллул дазу-зуманивсса Мексиканал зунттаву?» тIисса суалгу, чарив къакIулну, хIасул хъанай бия…

Шинну най дур, миннущал арх дуцлай дур жагьилшивугу. Ва оьрмулуву жула бюхъу-бажар ци бурив ххал бан ччинан зарал бакъассар, чан-кьансса жуйва «зулму» барчагу. Ва хIу­чча бувгьуну, нагу ттуламур дакIнинсса малхIанну язи дугьав зунттурдал бакIру, барзунтту ясир буллалимур тура.
Декабрьданийва айивхьуссияв на, ттула чIумух ва сантирахгу урувгун, ялун нанисса январь зуруй нава лахъансса зунттул пикри буллай. Хъунмасса пикригу къабувну, язи бувгьуссия Ухссавнил Американаву ца яла хъунмасса, Мексиканавусса, Орисаба тIисса зунтту. Ванил лахъшиврул 5700 метра дуссар. Орисаба ца-кIира шинал хьхьичI на лавхъсса Акон­кагуалуяр 1300 метралул лагьссар.
КутIану бусан, ччясса мутталий «Арулла бюхттулшиву» тIисса клубрал менеджер Анастасия Кузнецоващал кьутIигу чирчуну, билетругу лавсун, Мексиканавун бучIан ихтияр дуллалисса хасъсса сайтрахчIин щаллу хьура.

Январьданул 3-нний кIюр­ххил­сса рейсирай МахIач­къалалия Внуково аэропортрай левххун, яла Шереметьевалия Парижлив­сса самолетрай лавгра. Миччагу щябивкIру Мехиколийнсса самолетрай. ПаспортрацIун дархIусса цаппара давурттугу дурну, анаварну ура, ттула бузагу лавсун, отельданийн гьан. Чая му талихI! Гьа ялугьлай ура багаж булайсса кIанай, гьа ялугьлай ура! Агь, вил къаттай! Ахиргу телефондалийн дуркIунни ттунма бувчIлай къабувчIлачIисса ингилис мазрайсса смс-карду. ИвкIрахха танива ттухьа нава: «Лахьхьи ингилис маз, Зиябуттин» — тIий! Утти ма вин! Бакъар ттул чемоданну. Ттущала ца клубравусса Кристобеллущал лавхъру Мехиконал «Хуарес Интернешнл» аэропортрал кIилчинмур зивулий­сса жула бузлул жаваб дуллалисса офисравун. Ахиргу кIул хьунни ттул 23 кг дусса зунттуйн лахъай­ни ишла байсса ярагъ, янна-ус ва му-та дусса чантайгу, рюкзакгу Парижливва ливчIшиву, махъ буллунни мугьлат бакъа цаппара гьант­рава хъирив нанисса Мехиколийнсса самолетрай буза тIайла буккан. Мяйжаннугу, рюкзак кIива гьантлува бувкIуна, зун­ттул бакIрайн лахъайни ишла дайсса кьайлул бувцIумур чантай тIурча, бувкIуна на зунттул бакIрайнгу ивну, махъунай лив­ккун махъ.
ХIасил, зунттавунсса аьрххилий ласайсса кьай ттун арендалий ласун багьуна.

Зунттуйн лахъайни ишла байсса ярагъ ва янна-уссул иш бигьаяча, хIайп тIий ивкIра Парижлив чантайлувува Дагъусттаннал ттугъ ва ттула ГьунчIукьатIрал щарнил герб личIаврий. Щала ххуллийх хияллай ивкIссара, жула ттугъ ва герб зунттул бакI­рай цIакь дурну кьаританна тIий. Агь, вил къаттай! Жува ца тIий, Зал цамур тIий лякъай чIявуну.
Жу бивкIру яхъанай «Мария Кристина» тIисса отельданий. На усса группалуву ия ххюя инсан, вайннавух бизнес дачин дурсса Дмитрий ва Александргу. Цалчинма Иркутскалияссар, вамагу Екатеринбурграяссар. ЦIана кIиягу яхъанай ва зий-занай буссар Москавлив ва Варшавалий.

Группалувусса Елена ва Ольгагу – ца Угличраясса, вамур Москавлиясса бия. Жул гид Сергейлуягу чIявусса буслан аьркиншиву чIалай дакъар. Цала пиша кIулсса, жул группалул жаваблувшиву дан хIадурсса бакIчи ия ва. Шиккува кIицI банна, зунттул ухнилу жул группалувун гиччаллил хIал кIулсса гидталгу ххи хьуна.
КIюрххицIун, январьданул 5-нний, кIюрххилссагу дуркуну, акклиматизация дансса мурадрай, 4500 метра дусса Ла Малинча тIисса зунттуйн лахъан хIадур хьуру. Му кьинир ттул рюкзакгу аэропортрая бувкIсса.

Ла Малинчрайнсса ххуллу битан тIааьнсса бия. Тиягу, шиягу ттуршрахъул шинну хьусса бугьарасса мурхьирдал дяних бия, тIайланма ссавруннайн нанисса кунмасса, ххуллу.
Аьламатсса иш, хьхьирияр 4500 метралул лахъшиврийсса Мексиканал зунттаву (жучIава 3500 метралул лахъшиврий урттурагу хьунакъадакьайссар) мурхьру, къатIри хьунабакьлакьаву. Бигьану бия бачин. ХьхьичIсса 900 метралул манзил жу рахIатну бивтссия. КIийнмаймур ххуллурив битан жухьхьун ихтияр къадуллуна гиччаллил полициялул зузалт­рал. Иширах бургарча, кIий ялув ивкIусса инсаннал жаназа ляркъуну, силистталул давуртту най дусса дия. Жулмур хиялгу хасну га зунттуцIун бавхIусса бивкIун бакъахьувкун, хъунмасса аварагу къабувну, хIаллих ливк­ссияв ухнилун.
Гилу, лувгу, жуйнма тIайла бавцIусса, жу кунма, кIийн нани­сса, цамур группалухьгу бусарду жунма тIайлабацIу къавхьушиврия. Гайгу Орисабалийн хIадур хъанахъисса группа бия.

ЧчатIул кьацIгу увкуну, ца-кIира ссятрал дянив бивру Ори­саба-ЗунттулуцIсса турис­турал Зоапан тIисса ликказандарайн. Гикку жун хIадур бувну бия хъинну тIааьнсса, кIира зивулийсса къатта. Жуха къайгъулийсса компаниялул зузалтгу хъинну хIалимсса, дакIру тIиртIусса халкь бия. Жу бавцIусса къатлул магъуй бия бургъил батарея ва щинал бувцIусса хъун бакъасса цистерна. Къатлуву дия кIирисса щин ва гъилишиву. Га бия караматсса зунттал тIабиаьт дусса ва, хъатлий бивхьусса кунма, Орисабалийсса вулкан чIалачIисса кIану.
Мехиколия ОрисабалучIан­сса ххуллийн бувккун, кIива гьантлул дянив жу цимирагу ттуршрахъул километрарду риртхьунссия. Жул я бавцIуна шагьналлачIал дургьусса саргъун­сса хъуруннай, миннул чIарах дия кактусирттал, агавалул плантациярттугу. Ххуллурду бия тикку хъинну ххуйсса, так цаппарасса кIанттурду бия цемент ишла бувну бувсса. КIицI лаганна Мексиканал сайки циняв шагьрурду ва щархъурду хьхьирияр 2200-3000 метралул лахъшиврий дирхьуну душиву. Европанаву тIурча, нажагь бакъа къахьунабакьай зунттаву муксса лахъшиврийсса чIиви-хъунсса шагьру. ЭкваторданучIан гъан­сса кIану бушиву щуркIал хъанай бия тиккусса гьавалух бурувгунгу.

КIюрххицIун, январьданул 7-нний, жула баймургу бувну, сукку хьуру агьаммур лагерьданийн бачин. Ттувурив ялагу ттула бузагу бусса чантай хъирив бучIанссар тIисса хьул кьукьлайвагу бакъая. Ххуллу, асфальт бакъасса, синааьрщарал бия. Жу най бивкIру шанна ряд дусса джипирдай. КIира ссятрагу хьухьунссия му манзил битлай.
Жуламур лагерь жу приют­рая арх бакъасса кIанай хьун був­ссия. Ахттайнссаннул чIун хьуннин жу Сергейщал гьаз хьуссияв зунттул 150 метралул лахъшиврийн. Най дуна га лахъшиву жул чурххардин асар хьуна. Цавай бакIру цIий, цавайгу чур­ххал хIал бакъар тIун бивкIуна. Ттуннив, зунттуя учIайхту, дук­ралухсса тамахIгу кьувкьуну, га хьхьуну нава кIюрххилнин шанул ккик къаучинтIишиву бувчIуна. Мукун хьугу-хьуна. Ва ттуллара, чун, ци зунттуйн гьарчагу, муданнасса хасиятри.

Ахттакьунбизулуву чIаланну дяркъу хьуна. Гьич гъили лаган къаувнав текилла тIисса мексиканал хIачIиялул 50 граммралгу.
Га хьхьуну чан-кьансса гъили лагарчагу, шанурив лахъан къабювхъуна. Жун хъиривмур кьини ахттайн бизаннинма багьлай бия 4750 метралул лахъшиврийсса зунттуйсса лагерьданийн биянсса куццуй чIумуй буккан. Му кьини ттул буза Мехиколийн бившивугу баян бувна. Миннул хъиривния на Орисабалул ухницIа гьич зана къаикIантIиссияв: гьарца ттунна аьркинсса цимурца прокатрай ласун багьуна.
Ахиргу, январьданул 9-сса кьини, ссят 2 хьусса чIу­мал, сукку хьуру. БурхIай рюкзакру, лялух алхъанну дакъа­сса, микI гъа­гъансса рикIругу, ненттабакIурдийх лархсса фонарьдугу ци дуссар! Цаппара манзил битайхту, ччаннайнгу лаххарду альпинистурал мазрай учайсса «ччитри» тIисса, микIирайн цIапI куну лачIайсса муххал чIанну. Цаппара хIаллава бакIрайн дагьунни уттасса микIгу бавкьусса чарттал ххяли. Ца чIивисса гъалатIралгу хъунма­сса бала-апатIрачIан буцин бю­хъайсса, хъинну нигьачIисса кIану бия. КIива шаттирал манзил битарчагу, ласун къашай­сса къала лавсъссаксса шайвав.

ДакIгу лаласун захIматсса, ххаришиврулгу, нигьачIишиврияссагу хIасул хьу­сса асардал дурцIуну, дияйсса кьаралданийн дирну дия. ТIайланма учин, захIматну бия! Дя-дянийх: «Ци лирчIун дия вил, Зиябуттин, Мексиканал зунттаву?» тIисса суалгу, чарив къакIулну, бакIравун буххайва. Му хIалатраву цан бахкъачиви ттухун хьхьичI хьхьуну лахъан къабювхъусса шанугу! Агь, вил къаттай! Арх буцан бан шайрив! Ияйнийн ивну ура! Ялув тту­ккун ганиннин дукралух ишттахI къабивкIсса ккашилгу ура хIал ласун уллай.
КIюрххил ссят 7-нний дуниял чанна лахъаврищал дакIнийн ца илгьангу багьунни, чансса ттигу яхI бува тIисса. Зунттул бакIрайн биянгу дурарагу 200 метра лирчIун дия. ЧувкIуй аглан къавхьуну, так лавай бачин тIисса мяъналийсса гьимгу дуварду цаннайн цаннал.
Дурусну ссят 9 шаврицIун бивру Орисаба зунттул бакI­райн.
«Гьурра!!!» Жул гьура-гьай­талул га щала зунтту лав­с­хьунссия. Мяйжаннугу, Ух­ссанил Американаву яла лахъмур вулкан ясир дур­ссарив жура тIий, жуятува ххарилгу, пахрулулгу буру дазу-зума дакъа! 5700 метралул лахъсса зунтту, ваца ппиргъу кунма, лавсъссаксса хьуну буру, ххуллул луркIаннугу, вагь-ццахругу хъамадиртун. Зунттул мицIлийн ияхту, телефондалул зарядка духлаглай ляркъуну, так ца-кIира сурат рищун бюхъаврия дакъа щала пашманшиву да­къая.

Ци банссия!
Амма ттул ца яла хъуннамур ххаришивугу дия гьарца нава ясир бувсса зунттул бакIрай дувайсса ттула аьдат щаллу дан бюхъавриясса. БучIан бувну хъачIунттая ттула рюкзакгу, буккан бувну гива ттула буттал шяраватусса, ГьунчIукьатIрал зунттаватусса чару, палцI бував тичча тихунмай. Гиччагу, «Американал машгьур­сса зунттуясса ца чару бикIувча ттула аьзизсса зунттал билаятрай» куну, хъун бакъасса чарил парча бишав рюкзакраву. Шиккува кIицI банна, ттучIа утти чарттал мадарасса коллекция салкьи хьуну буссар.
Хъирив кьини жу бавчуру Мехико шагьрулул чулинмай. Нани ххуллий биврду Теотиуакан тIисса хьхьичIазаманнул халкь яхъанай бивкIсса кIанайн. Шикку бур Мексиканаву яла лахъсса пирамида – Бургъил пирамида учай ванийн. Лахъшиву – 66 метра. Дунияллий ва бур лахъшиву хIисавну кIилчинмур кIанай. Жу лавхъру ванил бакIрайн. БакI кьа ларгсса дур ванил.

Ттун пикри хьуна, багаж цила чIумал къадуркIун, зунттул бакIрай Дагъусттаннал ттугъгу, ГьунчIукьатIрал гербгу гьаз дан къархьукун ва лахъсса пирамидалул бакIрай гьазгу дурну, сурат рищун. Дахьва Дагъусттан тIисса чичругу дусса ттугъгу тIитIин бувну, группалувусса гьалмахчунащал бувгьуну, сурат рищун най буна, душварал чIу бавунни жуятува арх бакъа ­оьрус мазрайсса: «Агь, вана жула ттугъ, бачи сурат рищун», тIисса. Урувгра, кIива душ бур жучIан най анаварну. Бургарча, Да­гъусттаннаясса душру лявкъунни Мексиканаву бигьа лаглай Аьрасатнавасса группалущал! МахIаттал хьунна! Ва дунияллул зуманив жулва душру хьуна бакьин! Ци пикри хьунссия? АрхIал суратругу рирщуну, вай душваран ххуйсса бигьалагавугу чIа куну, жу ххуллийн багьру.

КутIа бан, Мехиколийн зана хьувкун, жу лавгссияв Троцкий яхъанай ивкIсса, утти музейран ккаллийсса, къатравунгу.
Тарихрал иширттавун куртIну бакI къадакьирчагу, кIицI банна нава хъинну махIаттал увшиву тайннал халкьуннал чил тарихрах дурсса аякьалул, лавгмунил хIурмат бушиврул. Хъинну хъунмасса, мадара ххуйсса багъгу бусса къатта бия та. ЧIалай бия тагу лази-лавкьуну, таниха ургъил буллай бушиву.
Жу бивссияв сувенирду, муму-тамур дахлахисса «оьрус­нал» кучалийнгу. Хъиннува махIаттал-хIайран увну ивкIра гьарца ацIра метралул дя-дяних «Вперед к коммунизму!», «Ленин жил, Ленин жив, Ленин будет жить! тIисса ва цаймигу укун­сса журалул плакатру лархъун ккаккайхтугу.

Укун къуртал хъанай бия жул Мексиканавунсса, Орисаба вулкандалийнсса аьрххи. Циняв рязийнугу ливчIунни, ххуй-ххуйсса асардугу ливчIунни жул дакIурдиву. Га кьинива хьхьувай на щяивкIун самолет­райгу, гава куццуй Парижлийх ва Мос­кавлийх хьуну увкIра шавайн, МахIачкъалалийн. КIицI бан ччай ура, нава ци хIукуматирттайн гьарчагу, цуксса ххуйсса асарду биян барчагу чил хIукуматирттал, ттул дакI мудангу кIункIу тIий дикIай шардайн, Дагъусттаннайн, Ла­ккуйн, ГьунчIукьатIув!
Учин ччай ура барчаллагь архIал бивкIсса гьалмахтурахь. Вай, мяйжаннугу, цIа дан лайкьсса инсантал бия. Цума ухьурчагу ия хIадурну цаманал чIарав ацIан, кумаг бан, думур гьалмахчунащал кIидачIин! Гьарцаннангу тIайлабацIу баваннав цала-цала аьрххирдай! ДакIниймур барт лаганнав!

Зиябуттин ХIажимирзаев.
Мехико-Париж-Москав-МахIачкъала.