[dropcap]Ф[/dropcap]евральданул 28-нний хьунни Дагъусттаннал Республикалул Халкьуннал Мажлисрал 31-мур сессия. Му бачин бувну ия парламентрал спикер Хизри Шихсаэдов.
Ххал бивгьунни 20-нния ливчусса масъалартту. Яла хъунмур масъалану хьунни ДР-лул ХIукуматрал 2018 шинал дурсса давурттал хIасиллал хIакъиравусса ДР-лул ХIукуматрал председательнал отчет. Муния жу бусанну гьарта-гьарзану хъиривмур номерданий.
Сессиялий дакьаврил судьятал бивтунни республикалул судирттал участокирттай.
Депутатътурал кIилчин дурккуну, ххалгу диргьуну, кьамул дунни цаппара законну: «Дагъусттан Республикалул паччахIлугърал граждан къуллугърал хIакъираву» тIисса закондалуву дахханашивуртту даву; «Дагъусттан Республикалул муниципал къуллугърал хIакъираву» тIисса закондалуву дахханашивуртту даву; «Дагъусттан Республикалий пассажиртал буцайсса ва буза буххайсса транспортрал сакиншиндарал хIакъираву» тIисса закондалуву дахханашивуртту даву» тIисса ва цаппара цаймигу законну.
Цаппара законнал проектру кьамул дунни, цалчин дурккуну.
