Цукун буру? Ци иш бур?

[dropcap]Н[/dropcap]а ссавур духларгун бикIара группалувусса ххарисса хаварду зухь бусан. Жула лакку оьрчIал ва душварал хьхьичIуннайшивурттая ва лайкьшивурттая гъалгъа тIун.

[dropcap]В[/dropcap]а гьантрай жу ххари бунну Хьурттал шяравасса МахIаммадрасуллул ва Зайнавлул арс ХIажи МахIаммадовлул. Уттигъанну Москавлив хьу­сса кикбоксинграл тIиртIусса чемпионатрай ХIажинал кIил­чинсса кIану бувгьунни. МахIаммадовхъал кулпат Москавлив ялапар хъанай бур. ХIажигу увну ур Москавлив 2004 шинал. Ва занай ур «Гладиатор» тIисса спортрал клубравун. Ванал тренерну ур ХIусайн Маршаков.
ХIажи спортрахун агьну дахьра шин ва дачIи хьуну дур. Ва чIирисса чIумул дянивгума ххувшавуртту ласун бювхъуну бур. Умуд бур ванал ттигу цимилагу ккаккан банссар цала гьунар тIисса. Иншаллагь.

Дустал, ттун нукIува бусан хъамабивтун бур, «Лакку билаятрал рухI» группалуву буссар шаннагу жула лакрал районнал щархъаясса 200-хъайсса инсантал. Группалуву буссар ИстIамлив ялапар хъанахъи­сса, жуна цинявннан бусравсса, АхIмад АхIмадов ва ЧIяйннал шяравасса Рамазаннул душ Аьли­лова Соня. Цинявппагу буний цIуллу баннав.
Ва нюжмардий жу, группалувасса, цаппара душру, хъамалу хьуру жула ГулханумлучIа. НахIува-нахIусса аьрайнгьавккури, чуттурду ва къячIив дувайсса Хъювхъатусса Гулханумлул кафе «Грильета» нукIува бусрав хьуну бур жула халкьуннан.

[dropcap]Я[/dropcap]лагу, вай гьантрай Москавлия бувкIунни жул Света. Группалуву аьчухсса, мукъуй цIу бусса Света цинявннан ххирассар. Ва бучIайсса кIулну, жу ялугьлай буссияв хьунабакьин, хъиннува гъанну кIул хьун. Света цу­ппагу Инишатуссар. Гьунарду чIявусса, кару мусилсса душри. Вания жу личIину бусанну. Жул хьунабакьаву хьуссар кIилчингу БанавшачIа «Балхар» кафелуву. Дустал, букъавсун цукун битави «Лакку билаятрал рухI» группалул цачIун бувми цинявппагу бур личIи-личIисса гьунарду бусса инсантал. Ус­ттарну рирщусса ччергъилттухун ххуй-ххуйсса балайрду тIий, мажлис чIюлу бунни Карашрал шяравасса Ххазинал. Индирал тIурча, хIазсса тIуркIурду бусса авадансса программагу хIадур дурну, жун ххуйсса дялахъру дунни. Ванил хIадур дурну дия жун цила сувенирдал ттучандалия чIири-хъунсса бахшишругу. Ва батIаврийгу жу хъиннува гъан хьуру, къакIулминнащал лажин лажиндарайн кIул хьуру. Ттун хъинну ххуй бизай цинярдагу хьунабакьавурттай гьуртту шайсса 1-мур ЦIувкIратусса Оьма­ев МахIаммадлул ва Тамарал кулпат. Бава-ттатта, вайннал душ Забида, ванил душру – студенткахъул – шанна никирал вакилтал. Ца ххуйну чIалан дикIай кулпатрал дянивсса хъярч-махсарттайсса арарду, цаннал цаннахасса хIурмат-аякьа.

МахIаммадлул мудан ххуй­сса махъгу лахъайссар, арамтал чансса бухьувкун, уххаву дакъа, жу циняв къавтIун бизангу байссару. Жу цачIун буллан Банавшагу чан къабаннав.
На хьхьичIвагу бувсъссия, «Лакку билаятрал рухI» тIисса нахIу-хIалимсса жул ужагърай буссар ххуй-ххуйсса дуаьртту кIулсса Карашатусса Гулсум, Хъювхъатусса Рукьижат ва Къяниятусса Лида. Ттун чIявуну хьунабакьай кказитрай дуаьртту рищаракьай, тIисса инсантал. Мунияту вайннал дуаьрттавасса ца-кIира дуллайгу бура.

ТалихIру булуннав,
мурадру булуннав,
ЦIуцIинай цIими
Аллагьнал бишиннав,
Хъинмур чивчуну лякъиннав.
Дуниял паракьатну личIаннав.

На дуаьрдая гъалгъа байхту, Аксаналгу чивчунни цинма бавсса дуаьлул журалий­сса ххару:

Аллагьгу дакIнийну
къуццу бувара,
ХIарачат буманан
барачат буссар,
Ххирасса Занналгу
кабакьинтIиссар,
Щяв багьсса чарил лув
щин къадачайссар.

ЗахIмат къабувайнал
хъу къадюхъайссар,
Канихь касму дунал
кару дюхъаннав,
БакIрах зузиминнал
бакI цIуллу баннав,
Ххуллийн увкманангу
ххуллухъин баннав.

ДакIнийсса мурадру
щаллу хъананнав,
ДакI ххарину шавай
зана икIаннав,
Ххаримур ва ххуймур
зун чIяву баннав,
Заннал чивчу кьадар
ххуйсса лякъиннав.

Кьадарданийн ивма
ххари уваннав,
Къадулуннав дардру
духIан къашайсса,
Къахьуннав мурадру
биттур къашайсса.
Оьмур арх буваннав
оьсса чувнащал,
Ххуймур чIяву баннав
дакIнин ччинащал.