Дайссар дукьрахIангу
хьамаран дирзсса,
Буссар арамталгу,
мажлис бан кIулсса.
М.-З. Аминов
Ххаллилсса хъусичу, лаккучу Акбардул арс Жабирдун хIакьину 65 шин хъанай дур.
Ттул ва Жабирдул оьрмулул тапаватшиву 17-лла шин духьурчангу, 40-ллахъул шиннардий мунал ва ттул дусшиву ца оьрмулул оьрчIал кунна най дур. Ттун дакIний дур гай дяъвилул захIматсса шинну, гьарца къатлухсса маоьрду, фронтрая зана хьуминнаягу хъуннасса ххаришиву дикIайва. Жабирдул ппугу, фронтрай щавугу дирну, увкIсса чIун дакIний дур. Акбар ия кIюла-лахъисса, ккаккан сахIибулхайр дусса, хъинну исвагьину, чакмардал ялтту галапай хIажакгу ларххун, кьатIувай уккайсса адамина. КIа ляличIину ттула итталун агьуна, гармун бищайсса уну тIий.
Акбардул арс Жабирдунгу хъинну ххирар музыкагу, музыкалуха зузимигу, цалагу ххуйну мандолина бищайссар. Макьаннаву ххуй-оьккимур личIи бан бюхъай. Жабирдул кумаг бувай музыкалуву, балай учавриву гьунар буми ялун личин буван, пагьму-гьунар ххиминнан бахшишру дурну, гайннал музыкалухсса шавкь хъиннура гужлан дуван. Ттул миннатрайн бувну, Жабирдул мадарасса, хIакьину щалагу Дагъусттаннайх цIа дурксса, балайчитуран кумаг бувссар.
Дустурал, жяматрал, миллатрал дянив Жабирдул кьиматгу, хIурматгу лахъри. Дустурал ккурандалуву Жабир уний щябикIаву-бизаву, мажлис тяхъану бачай. Ванал хъунмасса кумаг бувссар цала щарнил багьу-бизу ххуй бан, мизит бувайни, шяравун щин дуцайни тIий, ххуллурду бакьин бувайни ва цайми-цайми ххуй-ххуйсса давурттаву.
Ца шинал ттулва кулпатращал ниттих, аьпа баннав цил, уруган Хъусрахьхьун лавгсса чIумал, на къашавай хьунав, кIиккусса духтуртураягу личIисса кумаг къавхьуна. Микку Мирхалуннул оьвкуна Жабирдуйн. Гара кьини Жабир вертолетрай увкIун, на МахIачкъалаливсса больницалийн иян увнав.
Укунсса, инсантуран бусравсса, давуртту Жабирдул чIявуссаннан дурссар, дуллайгу уссар.
Ххирасса дус Жабир! На барча дуллай ура ина увсса кьини! ДакIнийхтуну чIа тIий ура вин цIуллушиву, дунияллий дусса ххуйшивуртту ва хъинбалартту!
Вил хIакьсса дус
Мазагьиб Шарипов
