[dropcap]М[/dropcap]артрал 15-нний ДР-лул БакIчи Владимир Васильевлул ва Дагъусттаннайн увкIсса Аьрасатнал Ухссавнил Ккавкказуллал иширттал министр Владимир Чеботаревлул дунни республикалул социал-экономикалул масъаларттал хIакъиравусса совещание. Владимир Васильевлул бувсунни Ухссавнил Ккавкказуллал иширттал агьамшиврия: «Жун бувчIлай бур, Дагъусттаннал агьалинан ччимунил, жу дуллалисса давурттал хъунмур бутIул хъар зул министерствалул давурттайн ва вийн дагьлай душиву. Жу вин жущава шайссаксса кумаггу, кабакьугу булланну. ХIакьинусса жулла батIавугу ми масъаларттал хIакъиравуссар. ХIакьину жун ка-кумаг буллай бур федерал центрданул. Республикалий хъанахъисса дахханашивуртту зул кумаграйнур хъанахъисса», — увкунни республикалул каялувчинал.
Дагъусттаннал БакIчинал бувсунни республикалул социал экономикалул тагьарданияту. Мунал тIимунийну, республикалий социал экономикалул тагьар хъин чулиннай даххана хьунни, лябуккулул бущи ххуйсса бур. 2018 шинал республикалул бюджетравун дучIан дурссар 39 млрд. къуруш, хьхьичIмур шиналнияр 6,6 млрд. къуруш, ягу сайки 20% ххину. Ларгсса шинал Дагъусттан гьуртту хьуссар АьФ-лул 25 программа дузрайн дуккан давриву, миккун харж дурссар 39,4 млрд. къуруш. Хъунмасса кумаг буллай бур федерал бюджетравату, дагъусттанлувтал барчаллагьрай бур АьФ-лул Президентнайн Дагъусттаннах хъуннасса къулагъас дуллалаврихлу.
Мукунма мунал бувсунни национал программарттал лагрулий гьашину Дагъусттаннал проектру дузрайн дуккан даву мурадрай итадакьин тIий душиву 14 млрд. къуруш.
Сергей Чеботаревлул бувсунни ва батIаву хьун хьхьичI ДР-лул ХIукуматрал председательнащал архIал лавгун ивкIшиву цаппара проектру бартдигьлагьисса кIанттурдайн: «Агромир» тIисса теплицардайн, «Матис» тIисса гипсрал заводрайн. Мунал тIимунийну, Дагъусттаннал экономикалул цаппара бутIраву хъинчулийсса дахханашивуртту хьунни. Масалдаран, промышленностьрал производствалуву лябукку хьуну бур 4,2 процентрал. Мура чIумал Аьрасатнал мура ккаккия дур 2,9%, СКФО-лулсса – сайки 1%. Мунийн бувну Дагъусттаннал промышленностьраву тамансса лябукку бур. Мунал мукунма бувсунни агросекторданувугу хъинчулийсса дахханашивуртту хьуну душиву.
Министрнал мукунма бувсунни Дагъусттаннайсса кIюла кIанттурдаятугу. «ХIарачат буллан аьркинссар агьалинан зузи кIанттурду ва доходру гьарза буллан», — увкунни Чеботаревлул.
ХIадур бувссар
ХI. Аьдиловлул
