Ларгсса нюжмаркьинисса вяъзалий МахIачкъалаллал Хъун мизитрал имам Зайнулла Атаевлул аьй дурунни бивкIу буччайни хъунисса харжру буккан буллалисса,чIявусса цадакьартту бачIлачIиминнай. Ванал чIурчIав дунни, ваца бяст-ччаллий кунма, кувннаяр кув ялтту буклай, чIярусса арцу харж дуллай бушиву инсан ахиратрал ххуллийн тIайла уклакисса ппурттуву.
ПатIимат Рамазанова
«Каши дакъасса инсанталгума бивкIу буччин буржру буллай, хIатта кредитругума ласлай бур, халкьуннал аьй къадуванну кьини лахъан тIисса журалий. Цаппара шяраваллаву ца инсан уччин бачIи миллион арцул харж буллалисса кIанттурдугума хъанай бур, бивкIулучIа давлатлувтал хъанай.
Вайннал, цадакьа баврил ва жижара баврил мяънара даххана дурну, гьарзад зия дуллай бур. Инсан ссукIурай щябивкIминначIан ияйссар жижара буван. Лахъину щяикIлан, дукралийн ухлан цичIав аьркиншиву дакъассар. Жижарагу бувну, чIал къавхьуну изан аьркинссар ялун бувкIминнал лувату», — тIий ур динчи.
Ва ур ялагу инсаннал цува сагъну унива бувсса цадакьалучIангу, хъинбалдарал давричIангу цичIав къадияйссар, му ивкIукун, сахаватну цадакьа бачIлансса чарабакъашиву дакъассар тIий. Зайнулла Атаев маслихIат буллай ур хъунисса цадакьартту бачIлай сукку хьусса инсантурахь, ва иширал хIакъираву «жулва диндалул аьлимтал укун тIий бур», «жулва муфтият укун тIий бур» тIий, ми бакIрай бацIанмур буллан аьркинссару тIий.
Буниялттунгу, инсан дунияллия лавгсса ппурттуву мунал думургу щина-цIарайн дичлай, дакъамургу дузал дуллай, бивкIулул заллухъруннай къия хъанахъисса кIанттурду чIявусса бур. Агьалинал каширдугу, маэшатгу, ахIвалатгу ца куццуйсса бакъар. Ва кIану хIисавравун лавсун, лакрал шяраваллавусса имамталгу шяраваллавусса агьалинан бувчIин буллан аьркинни бивкIулучIа давлатлувтал хъанан аьркин бакъашиву.
