[dropcap]Л[/dropcap]ичIи-личIисса билаятру, миллион инсантурал хIала бувхсса Авгъан дяъви лагь къашай къювуну ливчIунни жула билаятрал тарихраву ва халкьуннал оьрмулуву.
Совет аьрал Авгъаннавун бакьинсса хIукму бувну бивкIссар 1979 шинал декабрь зурул 12-нний. Мяйра шинаяр ххишаласса чIумуй талай бивкIссар Совет Союзрал 40-мур армия Авгъаннал аьрщарай. XX-мур ттуршукулий Совет Союз гьуртту хьусса яла лахъимур дяъви хьуссар Авгъаннавусса дяъви. Та дяъвилий жанну дуллуссар 13833 аьраличунал, цимиягу азарахъул инсантурайн щавурду дирссар.
Ватандалия архну, хъинну захIматсса, аьдат бакъасса тIабиаьтрал шартIирдай къуллугъ буллан кьисмат хьуссар жула арсурвавран. Та дяъвилий вайннал ккаккан дурссар хIат-хIисав дакъасса чувшиву. Авгъаннал дяъвилий ккаккан дурсса къучагъшиврухлу кIиттуршазарунния ливчусса саллатIнан ва хIаписартуран дуллуссар паччахIлугърал орденну ва медаллу, 72 аьраличунал лайкь дурссар Совет Союзрал Виричунал цIа. 40-мур армиялувасса 25 саллатIнан ва хIаписарнан дуллуссар Совет Союзрал Виричунал цIа аьпалул хьуну махъ.
Та дяъвилул вирттавраву бур авиатортал ва танкистал, разведчиктал ва десантниктал, сапертал ва связистал, рядовойтал ва хIаписартал.
Авгъан дяъвилул иширттаву гьуртту хьун кьисмат хьуссар Дагъусттаннал Виваллил иширттал министерстволул хIаписартурангу. ЧIявусса лайкь хьуссар паччахIлугърал личIи-личIисса наградарттан.
Вайннавух бур Башир Ибрагьимов, Ризван Ссапарбагов, МахIаммад МахIаммадов, Пайзуллагь Багьауттинов, Буниямин Айдиев, Залимхан Даххаев, Аюп Аджиев, Халил НурмахIаммадов, Надир Аюбов, МахIаммадрасул ХIажиев, МахIаммадсяид МахIаммадов, Шакир Жалилов, Фергадин Разаханов, Микаил Раджабов, Атай Ачаканов. Оьрмулун нигьачIаву дусса, захIматсса тагьарданий ккаккан дурсса къучагъшиврухлу лайкь дурссар вайннал цала наградартту. Абадлий дакIний бикIантIиссар Авгъан дяъвилий жанну дуллуми. Та дяъвилия чивчуну бур чIявусса луттирду, ларсун дур цикссагу киносуратру. Чил билаятрай аьрали бурж биттур буллай бивкIсса саллатI ва хIаписартал мудангу дакIний бикIантIиссар. Минная кIулну бикIан аьркинссар ялун нанисса никирангу.
Карина Махалова,
Дагъусттаннал МВД-лул юрисконсульт
