Абу Хурайлул ( цаяту Аллагь рязину личIаннав) бувсмунийн бувну, Аллагьнал   Илчинал увкуну бур: « ЧIявуссаннаяр ххув шайма акъар цIакь бума, цIакь бума сситтучIа ссавур дуван кIулмари».

Ва хIадис имам аль-Бухарил « Сахихраву» бувсун бур. Щалвагу  Дагъусттаннан агьамшиву ду­сса хIадис бур. Хъиннува чIявуну жува ссибизлан бикIару, аьрххи-ххуллийн бувккун, рульданух буний. Жунма ххуллу къабулурча, ягу жуярва хьхьичIун букларча, жува га цIана сситтуйсса махъгу тIун бикIару (хIатта ссугругума хIалану), яла заккунттайнгума буккару. Кувний заккунттай буккаврил ахир шай кувннал кув литIаврийнугу.

Уссурвал, вава  хIарачат буллан аьркинссару жува, ссибивз­сса ппурттуву жуйра жура къадагъа дирхьуну, ссавурданий бацIан. Ваца тренировкардайн заназисса кунма, жува гьар кьини ссибизаврил ялув бацIан аьркинссару. Бачияра ссибизаврил ялувбацIаврил тренировкардайн заназишиврий бикIаннуча. Нюжмардий ца кьини личIи дурну, хIарачат бувара му кьини зула ялув зува бавцIуну, сси­къабизанну занакьулу хьун.

Ялув кIицI лавгсса хIадис гьануну ласияра. Бургияра, хъанай бурив зущава, ссавур дурну, сситтун ччимур къабувну бацIан. Ялар зун бувчIинтIисса зува буниялттунгу цIакьсса ва гужсса буссарув, бакъассарув.

Мирзал арс МухIаммад