[dropcap]Ф[/dropcap]евральданул 20-нний Республикалул БакIчи Владимир Васильев каялувчисса Дагъусттаннал делегация гьуртту хьунни Москавлив Аьрасатнал Президентнал АьФ-лул Федерал Мажлисрайнсса Рисала дуккаврий. Муний паччахIлугърал каялувчинал кьимат бивщунни билаятрайсса тагьарданун ва бувсунни ялун дучIансса чIумал дузал бан аьркинсса масъаларттал хIакъираву.
Билаятрал Президентнал Рисалалий къулагъасрайн лавсун бур АьФ-лул виваллил иширттал, социал иширттал ва экономика хьхьичIуннай даврил масъалартту. Владимир Путиннул ляличIину къулагъас дурну дур майрал хIукмулий ккаккан бувну бивкIсса ва национал проектирдай гьартану бувсун бивкIсса масъаларттах. «Жулва масъалартту лахъисса мутталий дузал буллансса бур. Амма стратегиялул мурадирттан хасъсса масъаларттаха зун аьркинссар хIакьинува. ЦIанара аьркинссар иш-тагьар даххана дуллан хъин чулиннай. Мунияту исполнител властьрал давуртту гьарца даражалий дуллан аьркинссар бавкьуну, дуз дурну ва хIарачатрай», — увкунни АьФ-лул Президентнал.
Владимир Путиннул тIимунийну, хъиривмур шинал дайдихьулий дувантIиссар национал проектру дузрайн дуккан даврил цалчинсса хIасиллу, му чIумал дантIиссар исполнител властьрал гьарца даражалул органнал давурттал хIасиллу ва бищунтIиссар миннун кьиматгу.
ПаччахIлугърал каялувчинал бувсунни агьамсса масъалану хъанай бушиву кулпатран кабакьу баву ва миннун кумаграл хIакъиравусса документру хIадур бувну бушиву. Владимир Путиннул тIимунийну, 2020 шинал январьданул 1-нния махъ кулпатрал гьарца инсаннан 2 яшаврил минимумрал арцу дагьан дантIиссар, кулпатрал налограл гьивугу куклу дувантIиссар, яни цуксса кулпат хъунмасса бурив, муксса налог чансса ласлантIиссар миннал зузиминная.
ПаччахIлугърал каялувчинал Рисалалий чIурчIав дурунни цIуллушиву дуруччаврил, демографиялул (агьали ххи-чан хъанахъаврил) ва цаймигу масъаларттал хIакъираву.
