Уттигъанну хьунни капитал ремонтрал Дагъусттаннал фондрал хъунама МахIаммад Аьлиевлул пресс-конференция. Мунал республикалул журналистътурахь бувсунни ларгмур шинал фондрал давурттал хIасиллая ва гьашинумур шинал дансса давурттая.

ХIасан Аьдилов
[dropcap]М[/dropcap]ахIаммад Аьлиевлул тIимунийну, 2018 шинал лажиндарай, пландалийсса программалуцIун бавкьуну, рес­публикалий бакьин бувссар 50 чIявуквартира бусса къатри, миннун харж дурссар 259,60 млн. къуруш. Аьмну лавсун дукIу тIювалул шартIру ххуй-хъин дурссар 8000 инсаннал. Циняв къатраву даххана дурссар ма­гъив, дакьин дурссар фасадру, лифтру.

Муналва бусаврийну, цаппара шагьрурдай капремонтрахсса багьа булаврил тагьар къаххуй­сса дур. Амма цаппара шагьрурдай, масалдаран, Каспийскалий, Избербашрай ва Дарбантлив багьа булаврил тагьар хъин чулийннай даххана хьуну дур, ми шанмагу шагьрулий багьа буллай бур 38% агьалинал.

Журналистътурал буллусса суаллахьхьун жавабру дуллай, фондрал каялувчинал бувсунни хъиривмур шинал бакьин бан­сса къатри цукун личIи байссарив, хъунив хьуминнал капремонтрахлусса багьа булайссарив, ягу къабулайссарив. Мунал тIимунийну оьрмулул 70 шин хьусса ва 80 шин хьусса, лас ва щар инвалидтал, цив­ппалу ялапар хъанай бухьурча, миннал капремонтрахлу­сса багьа булайссар, амма миннан хIукуматрал чулуха лахъаву дайссар.

«Илчилул» вакилнал буллунни укунсса суал: «Циванни капремонтрахлу багьа ласайни къатрал квадрат метрарду хIисавравун ласайсса, фондрал квартирартту бакьин буллайгу бакъанува?» — куну.  «Ттун къакIулли квадрат метрарду циван хIисавравун ласайссарив, закон дур мукунсса», —  увкунни М. Аьлиевлул.