[dropcap]Ф[/dropcap]евральданул 11-нний ДР-лул ХIукуматрал Председатель Артем Здуновлул каялувшиврий хьунни ДР-лул Информатизациялул, связрал ва массовый коммуникациярттал министерствалул коллегиялул батIаву. Муний дунни ларгмур шинал давурттал хIасиллу.
ДР-лул минкомсвязрал каялувчи Сергей Снегиревлул бувсунни министерствалул дурсса яла агьамми давурттал хIакъираву ва гьашину дузал бан аьркинсса масъаларттая.
Министрнал тIимунийну, цаппара ведомстварттал дянивсса ва муниципалитетирттал дянивсса информациялул бутIуй Дуккаврил ва элмулул министерствалущал цачIуну сакин бувссар оьрчIал IТ -творчествалул центр «IТ Сиве». Сентябрьданий мунил гьанулий тIитIинтIиссар «Яндекс. Лицей». Микку хIадур буллантIиссар дунияллул стандартирттал даражалийсса пишакартал ва тIитIлантIиссар хъунисса IТ компанияртту. Проект лядуккан даншиврул министерствалул кьутIи чичинтIиссар «Яндекс. Лицейрал» ва «Учебникрал» каялувчитуращал.
IТ сообществалущал цачIу хIадур дурссар «Умные города субъектов России» тIисса Аьрасатнал Минстройрал ведомствалул проектравух гьуртту хьунсса заявка. Дарбант шагьру лахъан бувссар Аьрасатнал пилотрал аькьлу бусса шагьрурдал сияхIрайн. Мукунсса шагьрурду циняв буссар 36.
Минздравращал ва Ростелекомращал цачIу Интернетрал сетьрацIун бавзуссар 205 медициналул идара, бакъавзусса циняв бивкIссар 273, уттигу ливчIун бур 68, мигу базинтIиссар гьашинува.
Муниципалитетирттащал ва РТРС-рал филиаллащал цачIу дузрайн дуккан дурссар цифралул телерадиовещаниялул сеть. Зузи дурссар 164 объект, сигналлу дугьайссар 98% агьалинал къатраву.
Махъсса ппурттуву паччахIлугърал ва муниципал хIаллихшинну дуллалиссар электрон журалий. Му чулуха Дагъусттан яла хьхьичIунми регионнавух бур. Яла министрнал бувсунни массовый коммуникациярттал бутIуйсса ккаккиярттая, информатизациялул масъаларттая, «Мюнпатсса бюджет» тIисса проектрая. Яла ихтилатру бунни «Дагестан» РИА-лул директор МахIаммад МахIаммадовлул, Координациялул информациялул ва культуралул центрданул каялувчи Мухтар Амировлул, «Дагестан» РГВК-лул директор Елена ТIагьировал.
ДР-лул ХIукуматрал председательнал хъин чулийсса кьимат бивщунни Минкомсвязрал давурттан.
