Чурххал бурчун дарман

[dropcap]О[/dropcap]ьрмулул шиннах къабурувгун, цумур-бухьурчагу хъамитайпалун къатIааьнну бикIанссар цила чурххал бурчу ххарттасса ккирттараха лав­хьхьуну чIалачIисса бушиву. Му хьун къабитан, ягу, хьуну бухьурча, шайссаксса бючIан буван кумаг хьунтIиссар апттикIрая кIапIикIирттах ларсъсса сурсатирттая дурсса кремрая.

  Ларсун 200 мл. дусса банка, ччимур крем (яла-яларив хъин­ссар оьрчIалмур крем (детский крем), миву яла чанну дикIайну тIий заралми затру) дуртIуну му банкалувун, ялун дичин мумиелул 2 гурга, цаппарасса хIаллавун ми дарссуну, крем цIан лагантIиссар. Хъирив мивун бутIин аьркинссар апельсиндалул аьгъушиврул 10 кIунтI, 10 кIунтI чIичIиварттул (можжевельникрал) аьгъушиврул ва 2-3 кIунтI дарчиндалул (корицалул) аьгъушиврул ва ххуйну хIала дуван. Корицалул аьнтсса кьанкь душиврийн бувну, ца кIунтI бутIавай, кьанкь цукунсса ду­ккайрив ххал дуллай, мугъаятну бутIияра, чIяру къахьунну.

ХIадурссар бурчуйсса «растяжкарду», целлюлит сайки духлаган дувайсса крем.

Лажиндарал бурчу ххуй баншиврул

Хъаннил цалла лажиндарал чIалачIин жагьил даншиврул дуллалисса личIи-личIисса процедурарду, ххалаххив ялу-ялун машгьур хъанай бур. Амма къачанни уттигу ми процедурарду къакьамулсса, цала ялув бацIавриву шарда дуван бю­хъайсса, цIуллу-сагъшиврунгу зарал бакъасса, кулпатрал бюджетрайгу асар къашайсса маскардал чул бувгьусса ва карчI дакъа ми дуллалисса хъами. Мукунминнан ххирасса маскардаву ванилгу лайкьсса кIану бугьанссар.

АпттикIрая ларсун кьаркьсса водоросли (ламинария), дирчуну кIичIулувун миннул 2-3 чяйлул къуса, ялун дутIин аьркинссар кIирисса щинал 4-5 къуса. Щин дутIияра мугъаятну, чIяру къахьунну, мас­ка хьюму хьуну, лажиндараву дакъацIлай, зува авара къахьун. Щин дуртIуну, ххуйну хIала дурну, ялун бушкъап ларкьуну дитияра 15-30 минутIрайсса. Яла, ца-кIива кIунтI лимондалул сокрал бувтIуну  (аьгъумур бурчун), ягу рафинировать къадур­сса ччимур ххяххиялул аьгъушиврул кIунтIру (кьавкьмур бурчун) бувтIуну (бучIиссар А ягу Е витаминдалул аьгъусса растворданул ца-кIива кIунтI бутIингу, вайгу ччимур апттикIрай ду­ссар), ххуйну хIала дурну, лажиндаравух дуккияра, 20-25 минутIравун гъилисса щинай лажин шюшияра. Лажиндарал бурчул цIай бучIантIиссар, бурчу уттабуккантIиссар.

  Водорослирдал лажиндарахасса, чурххахасса къуллугъраву хъунмасса кIану бугьлай бур, салоннаву вай ишла дурну буллалисса процедурарду ялу-ялун машгьур хъанай бур. Амма вайннуясса маскарду къабучIиссар лякьлуву оьрчI бусса ягу оьрчIан ккукку буллалисса хъаннин, купероз, онкологиялул азарду думиннан, йодрайн аллергия думиннан, мукунна лажиндараву ххарци ягу тIиртIусса щаву духьурча, щитовид железа цила кьаралданий зий дакъахьурча.

Ламинария ишла дурсса маскарду нюжмардий цалнияр ххишалану дуллангу къабучIиссар, миннуву чIявусса йод, аскорбиндалул кислотIа душиву хIи­савравун лавсун.

КIизул ццуншиврун

Ццунсса, лази-лавкьусса кIиз мудангу сийлий бур. Амма лявхъуниява ццунсса кIиз гьарнал къабикIай. Шикку ххуйсса кумаг хьунтIиссар личIи-личIисса маскардая, анжагъ ми, курчIил къавхьуну, ссавурданий дулланни аьркинсса, нюжмардий цал-кIийлла, зурдардил лахъишиврий.

— НицI (2-3 хъун къуса), дрожжи (2 чяйлул къуса), тартнакI (100 мл.). Дахьра гъилисса накIлий (чIяру къахьунну) дяххан дурну дрожжи, ца ссятрай­сса диртун, миннул ялун ницI ва тартнакI дуртIуну, ххуйну хIала дурну, мархрая тIайла хьуну, кIизул щала лахъишиврийх дуккан аьркинссар, ялтту полиэтилендалул кьуцуру ва лачак ягу мурцIу бавхIуну, гъилишиву щаллу дурну, ца ссятрайсса диртун, яла шюшин бакI. Хъиннува хъинссар вилаглагисса щинавун ссиркалул ягу лимондалул ца-кIива кIунтI бутIирчагу.

— Ккунукрал хъахъу кIя­ламуния личIи бувну, кIялами ххуйну хIала бувну, кIизуйх бувккун, мукунма бакI гъилишиврий ца ссятрайсса бивтун, дахьра гъилисса щинай шюшин аьркинссар.

— Ккунукрал ца хъахъулувух ца-ца чяйлул къуса ницIал, репейрал аьгъушиврул ва коньяк­рал хIала дурну, бакIрал бурчуйх дурккун, ца-кIира ссятрайсса дитияра. Яла шюшара зува шюшайсса куццуй, шампуньдалий.

ХIадур бувссар
Бадрижамал  Аьлиевал