АхIмадлул арс Жамалов Сяид
[dropcap]Ф[/dropcap]евраль зурул 1-нний оьрмулул 87 шинаву дунияллия лавгунни Къяннал шяравасса ххаллилсса зунттал чув, захIматрал ва Буттал кIанттул цIанийсса дяъвилул ветеран АхIмадлул арс Жамалов Сяид.
Сяид увну ур 1931 шинал Къяннал шяраву. ЧIяйннал дянивмур даражалул школагу къуртал бувну, дуклан увххун ур Дагъусттаннал шяраваллил хозяйствалул институтрал ветеринариялул факультетрайн. 1956-ку шинал институтгу къуртал бувну, зун айивхьуну ур ветеринарну Ккуллал райондалул ветбаклабораториялий. Мунияр махъ зий ивкIун ур Гъумук Лакрал райондалул производствалул колхозрал управлениялий инспектор-организаторну, 1963-1968-ку шиннардий – Къяннал «Б. Искра» колхозрал председательну, 1968-1986-ку шиннардий – Къизлардал райондалий «Степной» тIисса совхозрал хъунама ветврачну. Муния махъ 1997-ку шинайн ияннин къуллугъ буллай ивкIун ур цала пишалий вацIлул, мелиорациялул ва щинал хозяйствалул министерстварттай.
Ванан дуллуну дур Буттал кIанттул цIанийсса дяъвилул ветераннал цIа. Лайкь хьуну ур «ЗахIматрал ветеран» тIисса цIанин, чIярусса медаллан.
Сяид ия гьарцаннащалагу хIал бавкьусса, ххаллилсса, гьарца чулуха итххявхсса, гьармуния кIулшивуртту дусса инсан.
Цала ччяни оьрмулуцIа хьусса аьзизсса кулпат Нинущал Сяидлул авлад къавхьуна. Бусравну уссия Сяид жяматрал, дустурал ва кIулминнал дянив.
Сяидлул бивкIулул кьурчIишиву кIидачIлай, жижара буллай буру цинявппагу гъан-маччанахь, жяматрахь ва дустурахь.
Цал бунагьирттал аьпа баннав, алжаннул ххари аннав, рухI бигьаний дишиннав.
Къяннал жямат
ХIажимурадлул душ
Ибрагьимова Асли
Тамансса хIаллай шануцIухгу бивкIун, дунияллия лавгунни зунттал тIабиаьт-хасиятрай хъунма хьусса, ас-намусрал бувччусса хъамитайпа, ххаллилсса кулпатрал ва ласнал ххазинану бивкIсса инсан, ГьунчIукьатIрал шяраватусса ХIажимурадлул душ Ибрагьимова Асли.
Асли бувну бур 1937 шинал ГьунчIукьатIрал шяраву. Тай дяъвилул шиннардийсса ккаши-мякь, кьянатшиву чIарах къадурккун дур, цайми дяъвилул оьрчIал кунна, Аслилгу. Зунттал душнил оьрмулул ххуллу байбивхьуну бур ичIува ниттин кумагчи шаврия. Дуклай бивкIун бур буттал шяравусса школалий. ХIарачат бусса душнин ччай бивкIун бур, духтур-хIакиннал хялатраву зузими ххуй бизлай, акушерка хьун. МахIачкъалалив медучилищагу къуртал бувну, бувкIун буттал шяравун, зий бивкIун бур ГьунчIукьатIрал медпунктрай. Миккунма багьайсса бивкIссар чIаравсса КIямашрал шяраваллил жяматгу. КъашайшалачIан оьвчирчан бахьтта битайсса бивкIссар зунттал ххуллурдугу. МиннацIун цIакь дурсса транспорт къадикIайссия та чIумалсса духтуртурачIа ва дакI марцIну байссия цащава шаймур.
Цила язи увгьусса Робинзоннущал бувссар Аслил чил эбрат ласунсса къатта-къушгу. Ахъулссаннун хьуссар кIия оьрчI ва ца душ. Шагьрулийн бивзун махъ яхъанай бивкIссар Каспийскалий. Асли зий бивкIссар Каспийскаллал 4-мур школалий медсестрану. ХIалал дурну дур бахшишру ва грамотарттугу. Даву кьадиртун махъ цилва оьрчIал оьрчIан мяърипат-насихIатрал муаьллим хьуна шаппа ванияту.
Аслил бивкIулул къумашиву кIидачIлай буру арсурваврахь Ибрагьимлухь ва Жамбулатлухь, душнихь Нинахь, вайнная бивзминнахь, ссурваврал оьрчIахь, щалвагу агьлу-авладрахь. Ванил барачат махъ ливчIун лякъиннав. Аслил рухIгу пирдавс-алжаннул ххари даннав!
ГьунчIукьатIрал
ва КIямашрал жямат
МахIаммадлул арс Ибрагьимов Зубаир
Январь зурул 22-нний, цакуну къюкI цIун хьуну, 56 шинаву жуятува батIул хьунни ЧIяйннал шяравасса МахIаммадлул ва Саниятлул арс Ибрагьимов Зубаир.
Зубаир увну ур 1963-ку шинал ЧIяйннал шяраву. Оьрмулул 7 шинаву щалва кулпат бивзун бур Туркманнавун, Иолотань тIисса шагьрулийн. Школа къуртал бувну махъ увцуну ур армиялийн. Къуллугъ буллай ивкIун ур цал Ташккантлив, махъ Авгъанисттаннай. Армиялия зана хьуну мукьах ивкIун ур МахIачкъалалив виваллил аьралуннал клубрал хъунаману. Шичча ва тIайла увккун ур дуклан Ленинградуллал аьраяллил училищалийн. Къуртал бувну училищагу, зана хьуну ур махъунай. Зубаирдул къуллугъ байбивхьуну бур взводрал командирная айивхьуну. Чачаннаву сукку хьусса дяъвилий Зубаир ивкIун ур роталул командирну. Микку муналгу, мунащалсса гьалмахтуралгу ккаккан дурссар хъуннасса къучагъшиву. Му иширан хасну яруссаннал шаэр Муслим Алакскийл чивчуну бур поэмагума.
Му дяъвилия мукьах Зубаир зий ивкIссар социал-психологиялул даврицIун бавхIусса группалул начальникну, яла зий ивкIссар Чачаннал республикалул аьраяллил комитетрай хъунама хIаписарну.
Ванал хIалал дурссар диялсса наградартту ва барчаллагьру.
ХIайп, чIун дакъанура, лавгунни жуятува ххаллилсса инсан, итххявхсса зузала, чумартшиврул ва чувшиврул бутIа ххину буллусса чув-адамина.
Зубаир аьпалухьхьун лагаврил пашманшивугу кIидачIлай, дакIнийхтунусса жижара буллай буру буттауссихь Ибрагьимлухь, уссурваврахь Басирдухь, Расуллухь, ссурваврахь, буттахь МахIаммадлухь, буттауссурваврахь ва цинявппагу гъан-маччаминнахь.
Цал бунагьирттал аьпа баннав, рухI бигьаний дишиннав. Ванан къабуллусса оьрму махъминнан булуннав.
ЧIяйннал жямат, дустал, гьалмахтал
ХIусайннул арс Увайсов Ярагъи
Оьрмулул 80 шинаву, хар-хавар бакъа аьпалухьхьун лавгунни Ваччиял шяравасса ХIусайннул арс Увайсхъал Ярагъи.
Ярагъи увну ур 1939-ку шинал Ваччатусса ХIусайннул ва Залиххал кулпатраву. Ххюя оьрчIава Ярагъи ивкIссар хъуна-хъунама.
Дянивмур даражалул школагу ЧIяв бувккуну, Ярагъи лавгссар армиялийн. Къуллугъ буллай ивкIун ур Калининградрай. Тичча тIайла увккун ур Хабаровскаллал аьраяллил училищалийн дуклан. Мугу къуртал бувну, цаппара шиннардий тиккува къуллугъ буллайгу ивкIун, увкIун ур Дагъусттаннайн. Зий уссия ТIиляратIиял райондалий райвоенкомну. Миччагу увцуссар МахIачкъалалив Дагвоенкоматрайн, 4-мур отделданул хъунаману. Ххюра шин миккугу дурну, капитIаннал чиндалуву лавгссар Краснодардайн.
1973-ку шинал, аьралуннал пишагу кьабивтун, пенсиялийн укканнин зий уссия производствалул отделданул хъунаману Кубанавтотранспортрал предприятиялий. Пенсиялийн увккун махъ зий уссия котельнайлий операторну.
Ярагъинал бивкIулул кьурчIишивугу кIидачIлай, дакIнийхтунусса жижара буллай буру ванал уссурваврахь, ссурахъаврахь, гъан-маччанахь, щалагу Увайсхъал тухумрахь.
Ярагъинал рухI хъинний дишиннав, алжан нясив баннав, ванал барачат махъ ливчIун лякъиннав.
Ваччиял ва ЧIяйннал жямат
Аьзизсса нину
Асли
аьпалувух дишаврил кьурчIишивугу кIидачIлай, жижара буллай буру жулва чIунархIал душ Ибрагьимова Нинахь, уссурваврахь ва махъсса агьлу-авладрахь.
Ниттил барачат махъ ливчIун лякъиннав, оьрмулул буччиннин битаннав хъунасса Заннал.
Аслил рухI алжаннул ххари даннав, гьав нурданул дуцIиннав.
Нинащал дуклай бивкIми
