Мариям Ибрагьимовал луттирдал ккаккия

[dropcap]Ф[/dropcap]евральданул 19-нний МахIачкъалалив А. Тахо-Годил цIанийсса Дагъусттаннал Национал музейраву тIиртIунни чичу, шаэр, публицист, хIакин Мариям Ибрагьимовал луттирдал выставка.

Бадрижамал Аьлиева
Выставкалул куратор Мария Шерматовал бавтIминнахь бувсунни Мариям бивкIшиву тIабиаьтралва гьарца чулуха гьунар ххину ляхъан бувсса инсан, цивугу цачIун хьусса хIакиннал, художникнал, тарихчинал, шаэрнал ва чичул пишарду. Бувсунни Мариям Ибрагьимовал цIа кIул хьушиву арулцIалку шиннардий, машгьур хьушиву урцIалку шиннардий, дунияллийн «Имам Шамил» роман-трилогия був­ккун махъ, цувгу хьусса мунил оьрмулул агьаммур захIматну.

Музейрал зузала Заира Кильдеевал бувсунни Мариямлул оьрмулул ва творчествалул ххуллия, мунил мархрая, чIурчIав дунни, ссаха зурчагу, Мариям тачIав хаин къавхьушиву хIакинналмур пишалийн.

— На чIявуну бияра Кисловодск шагьрулийн. Тикку бур мунил цIа дирзсса поликлиника. Шагьрулул инсантуран му хъинну ххирар ва муния хъунмасса пахру бур тайннан. Му хъанахъиссар Ккавкказуллал ва Аьрасатнал цашиврул лишан, — увкуна ванил.