Гъурбатрайгу ядува ччаву

[dropcap]Я[/dropcap]нварь зурул 28-нний ДР-лул миллатирттал политикалул ва диндалул иширттал министр Татьяна Гамалейл «Буттал кIанттухсса ччаврихлу» тIисса Дагъусттаннал ПаччахIлугърал ХIурматрал лишан дуллунни Ярославуллал областьрайсса Да­гъусттаннал вакил Асланбаг ТIалхIатовлун.

Имара Саидова

Награда тапшур дуллай, Татьяна Гамалейл кIицI лавгунни регионнал дянивсса машлул ва экономикалул хIала-гьурттушиву хьхьичIуннай давриву, Дагъусттаннал ва Ярославуллал областьрал гьарца чулухуннайсса дахIавуртту цIакь давриву ва региондалул этнокультура машгьур давриву ванал хъунмасса бутIа бушиву.

Республикалул каялувчитурал цала даврин  бивщу­сса бюхттулсса кьиматрахлу барчаллагь увкунни Асланбаг ТIалхIатовлул: «Ярославуллал областьрай дуллалисса агьаммур давуну хъанахъиссар,  гъурбатрайн бувкIсса ватанлувтал кьамул бувну, миннащал­сса дахIавуртту даву. Ялагу жу хIарачат буллай буру Ярославуллал аьрщарай Дагъусттаннал халкьуннал культура машгьур дансса проектру иширайну дачин дан. Мунияту ва наградагу на ккалли дуллай ура ти­кку ялапар хъанахъисса цинявппагу дагъусттанлувтурал чулухунмайсса хIурматну», — увкунни ванал.

Ванал мукунма барчаллагь увкунни гьарца цала дуллали­сса даврин кабакьу буллалисса ДР-лул Миллатирттал политикалул ва диндалул иширттал минис­терствалул зузалтрахь.