Халкьуннал творчествалун цIа кусса «Ссурулккуртта» тIисса ХVII ТIиртIусса Региондалул конкурсрайнсса давуртту кьамул дуллалиссар октябрьданул 30-нин. Гьашинумур конкурс хас дуллалиссар Театрданул шинан.

Бадрижамал Аьлиева
Ва конкурсравух гьуртту хьун бюхъайссар ччима инсаннаща – ци оьрмулул, ци пишалул унугу. Конкурсрайн тIайла дурксса давурттавусса ихтилат бикIан аьркинссар халкьуннал культура, щихачIав къалархьхьусса искусство, творчество дуручлачиминнаясса. ДуркIсса давурттан кьимат бишлантIиссар 5 номинациялий: «Сценаристнал ус­ттаршиву», «Режиссернал ус­ттаршиву», «Операторнал усттаршиву», «Яла ххуймур анимациялул даву», «Яла ххуймур оьрчIал/жагьилтурал программа». Гьарцагу номинациялий бикIантIиссар 1,2,3 кIанттурду ва гран-при. ХьхьичIунсса кIанттурдан ва гран-прилун лайкь хьуминнан дулунтIиссар арцуйнусса бахшишру ва ДР-лул Культуралул министерствалул чулухасса дипломру.

Конкурсрайн тIайла дурксса видеофильмру дикIан аьркин­ссар 15 минутIраяр хъун дакъа­сса, анимацион фильмру ва социал роликру – 5 минутIраяр къалахъисса.
Язими видеофильмру кка­ккан дувантIиссар «Дагъус­ттан» ГТРК-лий ва «Дагъусттан» РГВК-лий.
Конкурс дуллалиссар ДР-лул Культуралул министерствалул ва Республикалул Халкьуннал творчествалул къатлул, АьФ-лул Культуралул министерствалул ва Аьрасатнал Халкьуннал творчествалул къатлул, «Дагъус­ттан» ГТРК-лул ва «Дагъусттан» РГВК-лул чIаравбацIаврийну.
Конкурсрая гьарта-гьарзану кIул бан бюхъантIиссар Республикалул Халкьуннал творчествалул къатлул сайтрай.