Яргсса бия мажлис

Ларина Оьмарова ва Шамсуттин Къапланов

Хъинну яргсса, дакIний личIансса ЦIушинал мажлис хIадур бай гьаршинал Апанни Къапиевлул цIанийсса Лакрал драмалул ва музыкалул театрданул. Тамашачитуран концертру ххирашивугу хIисавравун ларсун, вава мажлис тикрал бай духмур ЦIушинал хьунийнгу.

Ци ляличIишиву дикIай чирча Лакрал театрданул концертирттал вайминнуяр, микку къадикIай фонограммартту, гьарца балайлухун руцлай бикIай музыкантътал цивппа, диялсса къулагъасгу дикIай халкьуннал балайрдах.


Арслан Шагьмардановлущал балайчитурахун руцлай бия цIанихсса ХIусайна ХIусайнаев (кларнет), театрданул жагьилсса актер Ислам МахIаммадов (дачIу).
Балайрду увкуна ХIажиаьли ХIажи­аьлиевлул, Саният Рамазановал, Луиза Шагьдиловал, Халисат Батbрбековал, Юлиана МахIаммадовал, Наби МахIам­мадовлул, Аьбдул Мурадовлул. Ярг­сса дия Луиза Шагьдиловал Арслан Шагьмардановлущалсса ва Ямлихан ХIажиевлущалсса, Халисат Батbрбековал Шамсуттин Къаплановлущал­сса, Зульфия Архилаевал Ибрагьим Рабадановлущалсса дуэтругу.
ХIаз лавсуна тамашачитурал Сиянат ХIажиевал «Дадаллахха на хъуна ув­сса» тIисса хъярчийсса хаварданийну­сса сценкалия. Му ккаккан бувуна Шамсуттин Къаплановлул ва Ларина Оьмаровал. «Ца ссятрайсса лас» тIисса, вава С. ХIажиевал чивчусса хъярчийсса хавар бувсун, вичIидирхьуми тяхъа бувна ПатIимат Давыдовалгу.

Концертрал яргшиву лапра ххишала дуруна театрданучIасса балетрал къавтIалтрал: Арсен Кьурбан­махIам­мадовлул ва Бадрижат Оьмаровал, Илдар ва Жамила АхIмадовхъал щаллу дурсса къавтIавурттал.
Лях-карах хъярч-махсарарттугу хIала бичлай, тIааьнну концерт дачин дурну бия Шамсуттин Къапланов ва Саният Рамазанова.

Лажин хIадур дурссар
Зулайхат Тахакьаевал