Жула лаккучунан, Чараваллал шяраву увсса ва хъуна хьусса, Москавлив Аьрасатнал медициналул академиялуву (РМАНПО) зузисса профессор, Ибрагьимлул арс Сяъдуллагь Абакаровлун гьашинугу дуллунни Аьрасатнал ХIукуматрал премия – Аьрасатнал цIуллу-сагъшиву дуруччаврил аралуву хьун дурсса ккаккиярттахлу. Сяъдуллагь Абакаров стоматологиялул дипломраяр махъсса дуккаврил факультетрал декан ур, Москавлив бур ванал цува заллусса стоматологиялул клиникагу.
П. Рамазанова
2016 шиналгу Сяъдуллагь Абакаров лайкь хьуссия кIулшиву дулаврил аралувусса Аьрасатнал ХIукуматрал премиялун. Дагъусттаннал ва Аьрасатнал лайкь хьусса хIакин Абакаровлул хIадур бувну бур аьмну кьунниха ливчусса элмурдал доктортал ва кандидатътал, ва ур ххюттуршунниха ливчусса элмийсса захIматирттал, 9 монографиялул ва учебникирттал автор. Ванал мудангу хьхьичIунсса гьурттушинна дувай дунияллул халкьуннал лагрулийсса дикIу, Аьрасатнавусса дикIу конференциярттай.
Ттигъанну Сяъдуллагь Абакаров Дагъусттаннал медициналул университетраву хьунаавкьунни преподавательтуращал ва студентътуращал, ва хьунабакьаврий гьуртту хьунни ректор Сулайман Маммаевгу. Стоматологиялул факультетрал декан ТIагьир Абакаровлул бувсунни Сяъдуллагь Абакаров цала захIматрал ва кIулшивурттал гьаз увсса хIакин ва аьлимчу ушиву, 1993 шинал ванал дурурччушиву элмурдал докторнал цIа ласунсса диссертация, муххал керамикалул протезру бишаврил тема ахттар дуллалисса, 1998 шинал профессорнал цIа ларсшиву. Сулайман Маммаевлулгу бувсунни Сяъдуллагьлул оьрму жагьилсса никиран эбратну хъанахъишиву. Сяъдуллагьлул, цала чулухасса барчаллагьрал махъгу лавхъун, кIицI лавгунни Дагъусттаннал медуниверситетраву хьусса ва хъанахъисса дахханашивуртту ябацIансса душиву, преподавательтурал ва студентътурал федерал лагрулий ххуйсса ккаккияртту хьун дуллай бушиву.
