Сулайман Чугуевлул цIа, шаэр хIисаврай, бюхъай илданийх личIину машгьур хьуну чIалачIисса къадикIангу. Ва чIявучин хъунмурчIин кIулну ия ЦIуссалакрал райондалул кказитрал корреспондент
хIисаврай, ЦIуссалакрал райондалул халкьуннал театрданул сий ххисса конферансье хIисаврай.
Амма, ванал кIунттила ва дакIнива бувксса шеърирду цал бухьурчагу бувккунан, бувккумур дакIницIух итабавкьуманан хъинну ххуйну кIулссар Сулайман Чугуев, циияргу хьхьичI, Заннал ва тIабиаьтрал аьш дирхьуну, уванну ляхъан увсса шаэр ушиву. Му шаэршиврул ххуллий цанма буллусса гьунарданул хъунмасса бутIа Сулайманнул бачIиннул бачIивагу ишла къабувнува ливчIсса ххай буру.
АрхIала шеърирдахун агьну къаикIаврилгу жува махIрумну личIан бувну бусса ххай буру лакку поэзиялул дунияллий загьир хьунтIий бивкIсса ххазинасса асардая.
Шикку чивчумунийн щак чин кунмасса пикри хIасул хъанай бухьурча, буккияра ва ца «Адабиятрал лажиндарайсса» Сулайман Чугуевлул щаращисса дакIнива ливчуну нанисса вай цаппарасса ххарувагу.
Руслан Башаев
Сулайман Чугуев
Барча вил байран
АцIния ххюннил цIубарз
ЦIунил ссавнийн гьаз хьунссар,
Ина барча бан бувкIми
Вил лагма ккуркки гьанссар.
Вил ччаврил оьттулучу –
ЛичIанссара на хьулух,
Цамур ччаврил аммарча
Рутанссар ина хьувух.
Барча, ххирамур, барча
Бувсса кьинилул байран.
Ва ттула дакIнил парча
Кьабитав вин пишкашран.
Вин цуксса къасаннугу,
Кьаритав вин ччавугу,
Ччан щуну дуккан дарча,
БухкIуллух къарал бача.
На чIарав акъанугу
Буслан вихь чIюлу махъру,
Вил бокалданул чIануй
Ттул макьри щарантIисса.
Мабукларда чIарах
Мабукларда чIарах, чIаракIлу кунма,
ЧIа тIий бакъахьурчан
ттул дакIнил гьавас.
ХъачIунттайх ка рутлай,
хъяхъаву дуллай,
Хъярчирай бунугу хъямала багьлай.
Магьуз чин улларда ххяхххан цIаравун,
ЦIунил ччаврил цIарай
дакI цIарайх дуллан.
КъабувчIайрив, ххирай,
ттул хъазамраву,
КъюкI дусса хIадурну ламаран лахъан.
Шайссарив, лажинни, вища лаласун,
Лайлатул кьадрину
ччаву кьюлтI дурсса.
ДакI вичIа дунугу хияллал ларсун,
Хьулданий къаурган на нижат дурсса.
Бухьхьу, ххирай
Ттущал ва хьхьу чIюлу дан
Букку, ххирай, кьатIувппай,
Ттул дакIниву цIу лахъан,
ЦIунилгу щурщу буван.
Шараврал шушари тIий,
Ва хьхьу вищал хIачIанна.
Ччаврил ихтиярди тIий,
Вил хьугу аьч буванна.
На авлия увунна,
Оьталати вил мурччал.
Заннайн хаин увунна,
КIяла арцул хъазамрал.
Жагьаннама учинна
Ттининнин бувтсса оьрму.
Оьрмулул мяънар чинна
Вищал гьан був лахIзарду.
Ттун ина аьркинна
Ттун ина аьркинна
Иттав чанину,
ЦIан хьхьунил лякьлуву
Чаннал тIимуну.
Ттун ина аьркинна
Ссавний цIукуну,
Архну чанна лавхъсса
Абад умудну.
Ттун ина аьркинна
Гъарал вирххуну,
Гьар шинах дучIайсса
Щюллисса интну.
Ттун ина аьркинна
Оьрмулул тIинну,
Ттула ялтту лирчу
ТалихIрал хъану.
Ттун ина аьркинна
Гьавасрал марчну,
Мудан лянхъа тIисса
Ттула ччавуну.
Манигьа бусара
Манигьа бусара…
Дакъассар ттул ччаву
Муксса баласса,
Вил тархъаншиврул ша
Аьщун бизлайсса.
Ттул ччаврил кIулшилун
Гьассар кIулшиву,
Ца аьрщарай бусса
Инагу, нагу.
Манигьа бусара…
Дакъассар ттул ччаву
ЦIими чIа тIисса,
Язугъ шайрив ккаккан
Иттав цIитI диркIсса.
Гьассархха ттул ччаврин
Умуд бухьурчан
Гьар кIюрххил бивзрав чин
Ина ккаккансса.
Ци хIазри?
Ци хIазри ттун мажлисрай,
Ина чIарав бакъани,
Мякь лиххан щаращивну
Вил яру ххал къашайний.
ТIутIал арив унугу,
Ци хIазри ттун муния,
Му аривсса тIутIину
Ина ххал къашайхьувкун.
Ци хIазри оьрмулия,
Оьнма най чIалачIисса,
Ва оьрму чIюлу буван
Ина чIарав бакъасса.
Ина цIуххара
ЩяйтIант тIуркIутIи яру,
Пишлищал хIала макру…
ХIаллих чIарав бацIара,
Рихшантрай ттухь цIуххара:
— Ина эшкьилул ттарцIрав,
Юхсса ччаврил аьлимрав.
Ча лякъав миксса махъру
Ттухь ччаврия буслансса?
— Цир ттул мукъурттил байсса
Вил дакIнийн къакьутIайсса,
Майшан тIий занай бура,
Нязаннив ххуйшиврул аргъ.
Цал-цал ттухгу битара
Лагъ угьай лухIи яру,
АцIазарва ччаврил баргъ
Хханххираву лахъара.
Ца хъинну
«Чумартсса хъамитайпалухь»
ЧIан дакъа урхьлува
нахIалтту кунма,
Эшкьилул лахIзарду
гьарнайх бачIара.
ДахIалай вил чурхгу, илкин бюхъугу,
Ччинан ччаврил мажлис –
Вил дакIнил хъюгу.
Агь, ччаврил савдажар,
Заваллийсса аргъ.
Нажагь вийн битарчан
ХIакьсса ччаврил баргъ,
ЦичIав личIавивав
ДачIра дакIния,
ДацIан дан бюхъайсса
Ччаврил барану.
Чув бура?
Чув бура, чув бура,
Ттул ччаврил гьайкал,
Щил дакIнил ттарацIув
Ччар дурну бура?
ДакIнийн къаагьайрив
Эшкьилул авдал?
Энадрай бавцIуну,
Арх бувцун бурав?
Хияллал гузатрай
Хьхьурду гьан дара,
Вил цIа тикрал дуллай,
Дуаь дувара.
Ккаккан хьул бивхьуну,
Щаувцун ура,
Вил чIуних мюхтажну
ВичIилий ура.
Циван къабучIара
ЧIарав щябикIан,
Оьнкьуврал бугълицIа
Ттул дакI марцI дуван.
Вихьва «ххирай» тIисса
Ттул щурщу баян,
Къаччинан къащилун
Ччаврил байран дан.
Ччива ттун
Вил дакIнин кIу къабизан
Вихь ххирай къаучара.
Ххирашиврул дазу дан
Заннайн леххаву чара.
Лухччиния ссав кунма,
Ина архну бунугу,
Ца лахIза лях бувгьуну,
Цал ттигу ккаккан ччива.
Шиши дагьсса дакIнива
Шикаят буван ччива.
Шархь ницIал яруннива,
Чаннал нур ласун ччива.
Вил ссихI щайний авцIуни,
СсихIир дарув бан ччива.
Вил гьайбатрайн я щуну,
Хъин шарав ккаккан ччива.
Азурда хьу чурххая
Ччаврил аьрза бан ччива.
Вил яруннил бярдаву
Аькьува шюшин ччива.
ЦIузурул симан кунма,
ЦIунил ина пар куну,
Вихттурлу бургъил кунна,
ДакIнил дард ласун ччива.
Шаэр
Вин дуниял дулун шаэр чумартссар,
Цаннасса къажанжи анжагъ дард ритан.
Хъяхъаву вин дулун, хIасрат кьюлтI дуван,
Луххайн цува увккун, цайми гъили бан.
Мунал хъус, хъиншиву тIиртIусса дакIри,
Хъазамраву къюкIри, цIурхьхьу тIийннасса
Щилтагъсса хияллал уртакь акъассар,
ЦIалхъанну хъапа тIун усттар акъассар.
Оьмунил, хъинмунил дазуну уссар,
РахIатшиву мунан цирив къакIулссар.
Мунал зид ва ччаву дуссар абадсса,
ПуркIу тIун къакIулссар, ччучлан бакъасса.
2000 ш.
Къаччиссар
Къаччиссар ттун лажин, цалий дакъасса,
Лажиннив, нетIарив дурчIин къашайсса.
Рангругу къаччиссар хIала даркьусса,
ЛухIимур, кIяламур дурчIин къашайсса.
Къаччиссар ттун щурщу, щаклий бувайсса,
ХIисаврай, цаманай бухьттан бихьлайсса.
Пахругу къаччиссар, аьлтта чIалайсса,
Ца мусил ккарччигу сийлун дирхьусса.
Къаччиссар махъругу щивщу кунмасса,
Цаннилагу хъирив заллу акъасса.
Къаччиссар хъинбала – лахъуни байсса.
ЦIимигу къаччиссар — цIанин бувайсса.
1980 ш.
Ниттихь
ЧIун дакъа оьрмулул чIун личIи дурну,
Жула духсса тIювайн вичIан учIара.
БухкIулу лахъайхту, вас-ццахлий уна,
Дадай, на вил иттав мюршну ургара:
Вил яруннаяту кьиблама дурну,
Ттула ххуллурдал хха тIайла бувара.
На аьрххилийн увккун, ххуллухъин чайни,
Ина на Аллагьнайн аманат ара.
Чявхъа гъарал ларчIун, ххуллу бяйкьуни,
Навагу вил ччаврийн таваккул бара:
КIулли ттун душиву ххют хьуну мудан
Вил ччаву ттул хъирив ххуллу мюхчан бан.
Дадай, вил дакIния дуцин дувара,
Вил дакIнийну ттухьра на дарс дишара.
ДакIнил марцIшивугу муний дуцара.
ВицIа лахьлай ура оьрмулул хьхьирийх.
ТIайла ххуллу ласун ттула жамилий,
Лайкьсса ххуллу ласун ттула жамилий.
ЧIун дакъа оьрмулул чIун личIи дурну,
Жула духсса тIювайн мудан учIара.
На гъан шара вичIан, гъан шайсса куна,
Заннал вакилначIан бунагь байщун бан:
Ккал дуллан икIара вил жигдатIрурдал.
Миннувух нарагу ххи дурцириннул.
1987 ш.
Лагабургъил ххютуй пашмансса сурат –
МечIавун дахьларгсса къатрал эяллу.
ДачIра даралуву гъапул ларгсса ратI.
Мюрш хъуруннай ххявхсса чарттал бакIурду.
Ттул дакIнийрив тIурча, дуссия сурат –
Ниттил хавардая нара щарщусса,
Гивугу накьичру личIи-личIисса,
Ва щарний диркIсса аргъ цаву чIалайсса.
Гиву бур оьрчIругу, оьрчIи-кIуригу,
Хъасарайн Ххюлувун найсса душругу,
ЧиваркIгу, Мюрш-ОьнтIрай чIиникI бишлайсса.
ХъицIил-КкурчIнил чарттай хъуни къужригу…
Ттул янилу тIурча – анжагъ эяллу.
КIихIулла пикрирду, аьсив хияллу…
Агь, пашманшиву вил, жямат бакъа щар –
Хханссара язинах лухIи ларх щащар.
Дуссияв тIар ина щархъаву щарну –
ЩутIул даралуву, лакрал зунттаву.
Уттирив вияту цIарагу дакъар.
Зунттаву чарттал ччар – ЧIаящиял щар.
Агь, вана на увкIун буттал шяравун.
АлхIан буккин увкIсса арс на хханссара –
ЧIумуйн данди бавцIу чарттал кIаланнахь,
Ятинну пашмансса бавкку кIичIирттахь.
1978ш.
Цумунийн учинну
тти буттал мина?
Хъинбала банъявав хъун хIакимтурал,
Гьайт куну, зулмулий арив бивчусса.
Тиканнан тартусса гъурбатрал аьрщи,
Багъ-бахчартту бувну, чIюлу данъявав?
Чил вилаххав кюру мархлун татайхрав,
Мархха кьакьлакьи мурхь щюлли шайххурав.
Агь, щил зай кунавав ттул миллатраха,
Мина-гьану лирну личIаннав куну.
Утти жува цару, «ЦIуссалакрал» халкь,
Ххяччарув, къярттарув щала миллатрал?
Агь, цимиллу жува ккуру бишайсса
Аьратталну найсса чIумул неххавух?
Лавгмур аьщун бивзсса ттул аьзизи миллат
Азурда буллай бур бучIантIимунил:
Цумунийн учинну тти буттал мина,
Буттал миналия байщусса жямат?
1992 ш.
Бакъар шану биллай
Гъинтнил бугъ багьсса хьхьуну
Бакъар ттун шану биллай.
Барзгу бур ссавнил хьуву
Ттущал архIал гузатрай.
Дюхлулсса хIукъу щайхту,
Вил ссихI щуссаксса шара.
Нажагь зуруйн я щурчан,
Ина ккавкссаксса шара.
Хияллал кай-кай увну,
ВичIа хьуну лякъара.
Караматсса хьулданий,
Хьурдай тIийна личIара.
Агь, ттул оьрмулул ххазнай,
Ччаврил дуллусса хIасрат,
Тула дакIнил кюрттарай
Бував на вин зиярат.
Ва хьхьугу зияратри,
Вия хияллай ларгсса.
Ттул махъругу дуаьри,
Так виха дуллалисса
Иша на аьпалувух
Вай аьрапалул гьантрай
Иша на аьпалувух,
Мазанарда ттух луглай
Аьрщарай сагъминнавух.
Уссия уча ахIмакь,
ДакIниву лама лавхъсса,
Мякь леххан ттул канища
Загьрулул кьуру хIавчIсса.
ДакIнин бути ххирамур,
Ттул рухI вил кIунттихь диркIсса.
На хIакьину жан дулун
Инава савав хьусса.
Загьрулун закъун чIа тIий,
Вина леххаврий ивкIсса.
ДакIнива ссихI буккайни,
Так вил цIа зумув диркIсса.
* * *
ЦIусса шинал хьулух инагу, нагу
Ци асардал мурчал цачIун бувнавав,
Дунъял хъамариртун, жува кIиягу
Ччаврил гьавасрайяв хъямала багьсса.
Хъамабитайссарив жува вив лавсъсса
Вил ва ттул каруннил карамат ккуртта,
Ца тирхханнарал тарг къюкIлил увкусса,
Ттул дакIнийх рирщусса ца цIарал къяртта.
Ца лахIзар, ца таргри ттул дакIний ливчIсса,
Ттул щала оьрмулул цуппа багьасса.
Ттул дакIнийх бавкьусса къащилул бурса,
Бургъил тIинттал кунма, басласи бувсса.
ДакIниву чичру данна
ДакIниву чичру данна
Ттуршийла ххирай чинна,
Яруннан чанинияр
Ина ххирара чинна.
Бизар хьурчангу ина
Ттул ччаврил хавардая,
Щакъалиххай учинна
ШархьницIал ярунная.
Ня щаращи бургъилу
Щинах мякь шайсса куна,
Ччаву щарай, чурххаву
Вих мякь багьну икIара.
Агь, хьхьунил ххуйшиву
Агь, хьхьунил ххуйшиву,
ЦIурттал яргшиву.
Гьавасрал тIуркIу бур
Кайп хьу дакIниву.
Ттул чурххайх бивщунни
Виясса хIукъу,
ХIавчIссаксса хьунна на
Шараврал къукъу.
Ттул мурччайн зивзунни
Вил ччаврил зурзу,
Ххябувккун лавгунни
ХIаярал гьухъа.
Жуйхва кай-кай хьуну куклусса кувку,
Караматрал чIануйн бивтунну ккуру
Арцул хъазам шюшлай –
Зурул чанигу,
Ччанавкку кIизуву –
Хьхьунил дюхлугу…
Ва щала дуниял –
Инагу, нагу,
Гьарзадрал мяънагу –
Ца вил мукъуву!
22
Кьини бархан бишлай багьтIатIал хьусса
Марчгу лагабургъил хьувун лявкIунни.
Караматсса хьхьунил виргъангу руртун,
Лагмава вацIагу шанан бивкIунни.
Урттул бакIрах бишлай бизар увайсса
ХъуцIурдил каманча кьабагьан бунни.
Луххал пирпилттаву цирда ладиркIун,
КъавтIилул кIалайрдал цIу лещан дунни.
Пуннукьул къатIрава къявхъа тIутIисса,
ЧюхтIи-Щаращулгу чIу шанювкьунни.
ЦIурттал щарш дарайлийн мусил ккузану
Ккуркки лавгсса барзгу ккуру лавгунни.
Иминшиврул щатIай щурщулий дуркIун,
Хьхьунил дюхлулулгу чIарав чул бунни.
ДакIнивун кьючлайсса дардирдал къурхъгу
ТIабиаьтрал ттува хIаллих чIа дунни.
Хханссара навагу уний авссусса,
Ягу хьхьемал кIунтIну чIапIаву ливксса,
Аьрщарал ялату цIан хьхьунил пардав
Зунзулчаннал каних хIаллих гьаз дуркун,
Ххяххабургъил тIинттай пперха тIунтIисса –
Ва щала дуниял циву пар тIисса.
