[dropcap]Я[/dropcap]нварь зурул 1-нний оьрмулул 65 шин хьунтIиссар Да­гъусттаннал лайкь хьусса строитель, щалвагу оьрму агьали яхъа­нансса къатри дуллай гьан бувсса,

Шагьабуттиннул арснан ХIажикьурбанов Сайдуннун. Строительнал даврий зийгу 40 шин хъанай духьувкун, ванал юбилей кIилийнуссар. ЦIуссаккулув ув­сса ва хъуна хьусса Сайдун цува 1-мур ЦIувкIратуссар.

---

ПатIимат Рамазанова
1977 шинал Дагъусттаннал политех институтрал инженер-строитель шайсса факультет къуртал бувайхту, зун тIайла увккун ур Аьшттарханнайн, «Каспрыба» трестрайн. КIира шин тикку зий дурну дур. Яла Хасавюртлив агьали яхъанансса къатри, школартту ва оьрчIансса садикру буллали­сса СМУ-5-лий зий ивкIун ур. Муния махъ шанна шинай зий ивкIун ур Германнаву совет аьралуннал къат­ралсса буллалисса управлениялул хъунаману. 1992 шиная 2003 шинайн ияннин Хасавюртлив­сса «Ремстрой» тIисса компаниялий каялувшиву дуллай ивкIун ур. ХIакьинусса кьини зий ур «АСД» (архитектура, строительство, дизайн) тIисса компаниялул мурадру бартбигьай директорну ва «СвойДом» тIисса строительтурал компаниялул каялувчину.

МукьцIалла шинал мутталий хьун дурсса Сайдуннул бюхъулул ва хIарачатрал ахъулссаннул хIасиллугу оькки­сса дакъар: агьали яхъанансса 35 къатри дурну дур, мукунма 5 школа ва 4 оьрчIансса ясли-садру бувну бур.
— Ттун мяйжаннугу ххирар ттулла даву, гъирарай зийгу ивкIра, ттигу зий ура. Нара дурсса къатрал чIарах нанийни, тай къатраву чIявусса кулпатру яхъанай бу­ссархха тIисса ххарисса асардал дакI видуцIай. Ттуща кьянкьану нара дурсса гьарцагу даврил жаваб дулунгу хьунссар, даву дагьайкун дуллай ивкIун тIий, инсантурай дакI аьтIий зий ивкIун тIий, — учай ванал.
Сайдун хъуна хьуссар ацIва оьрчI бусса хъунмасса кулпатраву, захIмат ххирасса, дуккавриву ва давриву итххявхсса оьрчIру ва душру бусса ужагърай. «Тахсир ба­къанма бувсса танмихIру» тIисса луттираву тарихчи ва пуб­лицист Дундар ХIажиев чичлай ур, ванал ппу Шагьабуттин ЦIуссаккуллал колхозрал хъунаману ивтсса чIумал, ганиннин тарихраву къархьусса бакIлахъия ларсъссар, колхозрал складру лачIал бувцIуну бивкIссар тIий. Нину-Виричунал цIа ларсъсса СахIибатгу ичIаллилссагу, оьрчIалссагу бувну, колхозрал даврийгума ка хъирив лаяйсса бивкIун бур.

Сайдуннул хъунама уссу ХIа­жикьурбангу зувинниха лирчусса шиннардий личIи-личIисса къуллугъирттай зий икIайссия ЦIуссалаккуй: шяраваллил хозяйствалул управлениялул хъунаману, совхозрал директорну, исполкомрал председательну. Муналгу биялсса хIарачат бувссар ЦIуссалаккуй шяраваллил хозяйство гьаз дан, цувагу Дагъусттаннал шяраваллил хозяйствалул лайкь хьусса зузалар. Хъунмур ссу ХIусайнова Арагу Дагъус­ттаннал культуралул лайкь хьусса зузалар, чIярусса шиннардий зий бивкIссар библиотекалул хъунмурну. Ссу ХIасанова ПатIимат ЦIуссалакрал гимназиялул директорну буссия, Дагъусттаннал яла хьхьичIунми школарттавух буссия му лицей. ПатIиматгу Дагъусттан Республикалул лайкь хьусса учителли. Вайннал кулпат, буниял­ттунгу, ляличIинува итххявхсса кулпатри, бакIра-бакIрах гьарманая бусангу лайкьссар. Циняв чялишну хIала буххайссар лакрал миллатрал оьрмулуву хъанахъисса иширттавух. ДакI-аьмал хъинсса, инсантуран аькьилсса маслихIат бангу, кумаграл ка кIидахIингу анавар уккайсса Сайдун ЦIувкIуллалгу, ЦIуссаккуллалгу язисса арсри, кIивайвагу жяматрангу ххирассар.

Жу дакIнихтуну барча дуллай буру вил юбилей! Барча буллай буру му даврий зий хъанахъисса вил 40 шинал таварихгу! ЧIярусса шиннардий агьали ххари буллан­сса къатригу, цайми давур­ттугу дуллансса цIуллушиву дулуннав ви­хьхьун!