«Мюхчансса ва ххуйсса ххуллурду» тIисса приоритетсса федерал программалийну жула хъуншагьрулийсса ва мунил лагма-ялттусса ххуллурду бакьин буллай, мяйжаннугу хъуни-хъунисса давуртту дуллан бивкIунни.
СКФО-лул региондалийсса так ца Дагъусттаннан тIайлабацIу хьуссар, ва федерал программалийнгу багьну, вайксса ххуллурду бакьин буллай булукьингу.
З.АьбдурахIманова
ХIакьинусса кьини жулла республикалий ца яла щириркIумур федерал проект ва хъанахъиссар. Проектрал агьаммур мурадгу машинартту лагайсса хъуни ххуллурду низамрайн буцаву ва халкьуннал оьрмурду мюхчан бавур. Ххуллурду буллай сукку хьуннин ххал диргьуссар республикалул ГИБДД-лул хIасиллу. Мисалдаран, ххал бивгьуссар чIявуну аварияртту, халкьуннайн машинартту щайсса кIанттурду.
Аьмну программа щурун дайдирхьусса 2017 шиная шиннай МахIачкъалалив бакьин бувссар 71 ххуллу ва шагьрулувун бухлахисса кIива ххуллу. Вайннувух — МахIачкъалалия аэропортрайнсса ххуллугу. Ва ххуллу хъанахъиссар уттизаманнул ххуллурду бай технологиягу ишла дурсса 1-мур категориялул ххуллуну. Ванин харж бувну бур 1млрд 275 млн арцул.
2018 шинал программалийн лавсъссар халкь бахьтта заназими кIанттурдугу. МахIачкъалалив дакьин дурссар 107 кучардайхсса ххуллурдал 90 км. ва шагьрулувун бухлахисса 8 ххуллул 40 км. Вай давурттан харж дурну дур 1,5 млрд арцул. Вайннул дачIи — федерал бюджетрава, лирчIми — республикалулмунива.
Ххуллурдайх даркьуну дур 39240 тонна асфальтрал ва цIу дурну дур 1920 люкирдал кьалакьив. Тротуардайхсса ххуллурдайхгу 84545 кв.метралийх асфальт бавкьуну бур.
Ва шинал МахIачкъалалив, Шамиллул ва ХIамидовлул цIанийсса кучардайх заназисса машинартту чан баву мурадрай, Примаковлул цIанийсса куча буллай байбишинтIиссар. Му хъанай бур «1000 мелочей» тIисса ттучан бивкIсса кIанаяту Лениннул цIанийсса кучалийн букканнинсса ххуллу. Ххуллурду мукунма буллантIиссар ДОСААФ микрорайондалийсса 5 кучалийгу.
Ххуллурду бакьин буллалисса давуртту мукунна щурунтIиссар республикалул районнайгу.
