Жижара

Жуйн цинявннайнмагу асар биян бунни Бакуяту бувкIсса пашмансса хаварданул – жула лакрал цIанихсса чичу, шаэр, аьлимчу
Курди Закуевлул арс Фаик
аьпалухьхьун лавгунни тIисса.
Хъуннасса къумашивугу кIидачIлай, дакIнийхтунусса жижара буллай бур Фаиклул ичIуваминнахь, махъсса цинявппагу гъан-маччаминнахь.
Цал рухI рахIатний дишиннав, махънал оьрмурду лахъи баннав, имандалий лавгун лякъиннав.

«Илчи» кказитрал коллектив


ЧIяйннал КьурмахIаммадлуха

Хьуну оьккисса апатI,
Ина унна бирибат.
АьтIи буван ххуй авлад —
Му биявав вил кьисмат!

КкухIлан багьунни ва дард,
Мурадру къалавгна барт.
ЧIа чинну алжан-мурад,
Маччанан – вил барачат

Вил дакI ва яхI-къирият
Хьунни жяматран эбрат,
Жул вирттавраву чумарт,
ЧIяйннал ххуй КьурмахIаммад.

Мустангир,
ш. ЧIяйми


ХIасаннул душ Ибрагьимова Савдат

Январь зурул 14-нний оьрмулул 90 шинаву ахиратрахьхьун лавгунни Бархъаллал шяравасса ххаллилсса зунттал душ, тарбиячи, партиялул зузала, захIматрал ветеран Савдат Ибрагьимова.

Бувну бур Савдат 1929 шинал Бархъаллал шяраву Буттал кIанттул цIанийсса дяъвилул участник ХIасан Ибрагьимовлул кулпатраву.
Бархъаллал шяраву 7 класс­гу бувккуну, Савдатлул гихунмай къуртал бувну бур Ахъушиял дянивмур даражалул школа. Бувххун бур Грозналлал педагогикалул институтравун. Мугу къуртал бувну махъ зун бивкIун бур Бархъаллал дянивмур даражалул школалий. 1958-ку шинал къуртал бувну бур партиялул школа. Зий бивкIун бур ЦIахъарав партиялул райкомрал хъаннил отделданул хъунмурну. Му чIумал ЦIахъардал райком партиялул кIилчинма секретарьну ивкIун ур ванил ппу ХIасангу. Мунияр махъ Савдат зун бивкIун бур Ахъушиял райондалул партиялул комитетрай кIара хъаннил отделданул хъунмурну. 1964 шинал ва бувчIуну бивкIун бур Шяраваллил советрал председательну. Ва къуллугърай бивкIун бур 1969-ку шинайн бияннин. Мунияр махъ цIунилгу зун бивкIун бур Бархъаллал школалий. БувчIуну бур школалул партиялул организациялул секретарьну. Аьмну мукьцIаллихъайсса шинну дурну дур Савдатлул школалий зий.
Ци даврий бухьурчагу, цийва бивхьусса буржру марцIну би­ттур буллай бивкIун бур. Цимилагу лайкь хьуну бур хIурматрал грамотарттан ва барчаллагьир­ттан.
Савдат аьпалул шаврил пашманшивугу кIидачIлай, жижара буллай буру арснахь ХIасаннухь, душваврахь Разиятлухь ва ПатIиматлухь ва щалагу агьлу-авладрахь.
Махънал оьрмурдай барачат бишиннав, Савдатлул рухI алжаннул ххари даннав.

Бархъаллал жямат