Декабрьданул 30-нний Дагъусттаннал БакIчи Владимир Васильевлул каялувшиврий хьунни ДР-лул БакIчинал ва ХIукуматрал Администрациялул аппаратрал гьартасса батIаву.
Муний гьуртту хьунни ДР-лул ХIукуматрал председатель Артем Здунов, ДР-лул БакIчинал ва ХIукуматрал администрациялул каялувчи Владимир Иванов, ДР-лул ХIукуматрал председательнал 1-ма хъиривчу Анатолий Карибов, министерстварттал ва ведомстварттал каялувчитал.
Республикалул каялувчинал дунни лаглагисса 2018 шинал хIасиллу, бувсунни дан-дитан бювхъумуния ва ялун нанимур шинал дузрайн дуккан дуван аьркинмуния. Владимир Васильевлул тIимунийну, цIанасса ппурттуву хIадур дуллай бур Халкьуннал Мажлисрайнсса Рисала.
«ХIакьину ттун зухь барчаллагь учин ччай бур жура цачIу дурсса давурттахлу, цIана жува лайкьсса кIану бугьлай буру Аьрасатнал регионнал дянив, му жущава бювхъуссар зулгу, циняв дагъусттанлувтуралгу захIматрайну», — увкунни Владимир Васильевлул.
Мунал мукунна кIицI дунни республикалул ихтиярду дуруччаврил органнал давурттугу: «Жура дайдишарду коррупциялущалсса талатаву, низам дишаврил, инсаннал ихтиярду дуруччаврил давуртту. Инсантуран ми гьарзат хIисав хъанай дур. Жува ккаккан барду ми давуртту бартдигьин жущава бюхъайшиву».
Дагъусттаннал БакIчинал дакIнийн бувтунни жула региондалун Аьрасатнал Президентнал ва ХIукуматрал чулуха кумаг буллалишиву. «Жулва хьхьичI уттигу захIматсса масъалартту бур. ЦукунчIав паракьат хьун къабучIиссар. Инсантурал жуйнна вихшала дирхьунни – мури яла агьаммур», — увкунни республикалул каялувчинал.
Ялун нанисса чIумал бартбигьин аьркинсса масъаларттавасса ца агьаммур, Владимир Васильевлул пикрилий, хъанай бур мюнпатсса управлениялул система дузал даву.
Аппаратрал батIаврил ахирданий Дагъусттаннал БакIчинал администрациялул цаппара зузалтран дуллунни паччахIлугърал наградартту.
