[dropcap]М[/dropcap]ахIачкъалалив Р. ХIамзатовлул цIанийсса Национал биб­лиотекалий хьунни «О ходе реализации Закона РД «Об образовании в Республике Дагестан» тIисса темалухунсса агьали бавтIсса вичIидишавуртту (публичные слушания).

Бадрижамал Аьлиева
Мажлис тIивтIуна ДР-лул Халкьуннал Мажлисрал председательнал хъиривчу Елена Ельниковал. Цила ихтилатраву ванил кIицI лавгунни шикку ххал бигьлантIисса масъалартту ччянива салкьи хьусса бушиву, ца залданувун цавай пикрилул инсантал, даврил уртакьтал, рес­публикалий кIулшиву дулаврил масъалартту щаллу буван ччими бавтIун бушиву.

ДР-лул Халкьуннал Мажлисрал КIулшиву дулаврил, элмулул, культуралул, жагьилтурал иширттал, спортрал ва туризмалул комитетрал председатель Мурат Пайзуллаевлул цалвамур ихтилатраву гьаз бувуна лекьавайсса тагьарданийсса школалул къатрайн, шанна сменалул режимрай зузисса школарттайн, учительтурал харжирдайн, дуклаки оьрчIру транспорт­рал щаллу баврийн багьайсса масъалартту.
Гьарта-гьарзасса доклад бувуна ДР-лул кIулшиву дулаврил министр Уммупазил Оьмаровал. Ванил чIурчIав дунни ва журалул масъалартту депутатътуращалгу, щалла обществалущалгу ххал бигьлагьаврил хъунна­сса агьамшиву душиврий.

— КIулшиву дулаврихсса къулагъасрал чIалачIи буллали­ссар общество хьхьичIуннай нанав­рил даража. КIулшиву дулаврих багьайсса ургъил къабуллалисса обществалуву хъин чулиннайсса дахханашивуртту дикIан къабюхъайссар. Учительнал дикIан аьркинссар квалификация, гихуннай му ларай дулланшиврул. Дуккаврил идарарттугу лекьавайсса тагьарданийсса, мурчал-гъаралуннил ласласисса бикIан къааьркин­ссар. ЦIанасса чIумал гьаз буллай буру цинявппагу школар­ттай санузеллу къатрал вивсса бикIан багьлагьишиврул масъала, ва масъалалул ялув авцIуну уссар региондалул бакIчи цува. Школартту ттизаманнул материалданул ва техникалул базалул, кьай-кьуйлул щаллу буван аьркинссар, — увкунни Уммупазил Оьмаровал.

Министрнал мукунма гьаз бунни школарттай ва оьрчIал садикирттай кIанттурду биял къахъанахъаврил масъала, бувсунни дуккаврил даража лахъ буван министерствалул дуллалисса давурттая. КIулшиву дулаврил министерствалул хьхьичIсса масъаларттаву ца яла агьаммунин ккалли бувунни ниттил мазрал дарсру дишаврилмур масъала. ЦIанакул жулла республикалий сакин бувну буссар Ниттил мазурдил педагогтурал ассоциация. Ниттил мазурдил дарсирдал луттирдая тIурчаннив, 6 мазрайсса луттирду ххал бивгьуну бусса бур, миннувасса цаппара заказ бувну бусса бур, цаппара республикалул бюджетравасса арцух лавсун бусса бур, мунияту му журалул луттирдал щаллушиндараясса, бити цалсса ца-кIива миллатралсса бунугу, ихтилатру бачин буван бюхълай бур.

Мукунма хьунни ихтилатру къалпсса медалистътураясса, ялу-ялун Цасса паччахIлугърал экзамен дуллалими чан хъанай бушивриясса, мисалдаран 9-мур класс къуртал бувсса 35 азара оьрчIава анжагъ 13 азара личIайсса ур ЕГЭ дулланнин. Мунищала архIал дакI ххари хьунсса хаваргу – аттестат бувагу къалавсун личIлачIисса оьрчIру ялу-ялун чан хъанай бусса бур, ЕГЭ-лий 80 баллданияр ххишала лавсми оьрчIру гьарза хъанай бусса бур.
Хьунни цаймигу ихтилатру, шагьрурдал ва шяраваллал школарттайн багьайсса.